நாகப்பட்டினம்: அமைச்சர் ஷாஜகானின் தலையீடு காரணமாக, கந்தூரி விழாவுக்காக தமிழக அரசு ஆண்டுதோறும் இலவசமாக கொடுக்கும் சந்தனக் கட்டைகளை புறக்கணிப்பது என நாகூர் தர்கா நிர்வாகம் முடிவு செய்திருப்பதாக தகவல் வெளியாகியுள்ளது.
நாகை மாவட்டம் நாகூர் தர்கா கந்தூரி விழா ஆண்டுதோறும் விமரிசையாக நடைபெறும். இந்த ஆண்டுக்கான 470-வது கந்தூரி திருவிழா நவ.10-ம் தேதி தொடங்குகிறது. இதில் சந்தனம் பூசும் நிகழ்வுக்காக 2012-ம் ஆண்டு முதல் தமிழக அரசு சந்தனக் கட்டைகளை இலவசமாக வழங்கி வருகிறது.
அப்போது முதல் 2017 வரை நாகூர் தர்கா ஆதீனம் காமில் சாகிப்பும், 2018, 2019 ஆண்டுகளில் தர்கா நிர்வாகத்தை நிர்வகித்த இடைக்கால நிர்வாகிகள் அலாவுதீன் ஐஏஎஸ் மற்றும் நீதிபதி அக்பர் ஆகியோரும் அதற்கான அரசாணைகளை பெற்றுக் கொண்டனர்.
2020, 2021-ம் ஆண்டுகளில் கரோனா பரவல் இருந்ததால் இதற்கான அரசாணை தபால் மூலம் அனுப்பி வைக்கப்பட்டது. 2022-ல் இடைக்கால நிர்வாகம் நீக்கப்பட்டு, மீண்டும் பரம்பரை நிர்வாகம் நீதிமன்றம் மூலம் பொறுப்பேற்றது. அதன்படி, 2022-ல் தலைமை அறங்காவலர் காமில் சாகிபும், பிரசிடென்ட் கலிபா சாஹிபும் முதல்வரிடம் இருந்து சந்தனக் கட்டைக்கான அரசாணையை பெற்றனர். 2023 முதல் கடந்த ஆண்டு வரை தலைமை அறங்காவலர் காஜி உசேன் சாகிபு, பிரசிடென்ட் கலிபா சாஹிப் ஆகியோர் முதல்வரிடம் இருந்து அரசாணையை பெற்றனர்.
அதன்படி, இந்த ஆண்டும் அவர்கள் தான், சந்தனக் கட்டைக்கான அரசாணையை பெற வேண்டும். ஆனால், இந்த ஆண்டு சிறுபான்மை நலத்துறை அமைச்சர் ஷாஜகான் சார்ந்த இந்திய யூனியன் முஸ்லிம் லீக் கட்சியைச் சேர்ந்த ஒருவரை முன்னிலைப்படுத்தி அவரிடம் சந்தனக் கட்டைக்கான அரசாரணையை வழங்க ஏற்பாடு செய்து வருவதாகவும், இதற்கு வக்ப் வாரியம் ஒத்துழைப்பு தருவதாகவும் கூறப்படுகிறது.
இதையடுத்து அறங்காவலர்கள் குழுவினர் அமைச்சர் ஷாஜகானை சந்தித்து கேட்டபோது, ‘தலைமை அறங்காவலரும், புதிய நபரும் சேர்ந்து அரசாணையை பெற்றுக்கொள்ள வேண்டும். இல்லாவிட்டால், தர்கா நிர்வாகத்தை கலைத்து விடுவேன்’ எனக் கூறியதாக தெரிகிறது.
இதுதொடர்பாக, அறங்காவலர்கள் கூட்டத்தில்தான் முடிவு எடுக்க இயலும் என்று அமைச்சரிடம் சொல்லிவிட்டு அறங்காவலர்கள் நாகூருக்கு திரும்பியதாகவும், இன்று (அக்.21) அறங்காவலர்கள் குழு கூட்டம் கூட்டப்பட உள்ளதாகவும் கூறப்படுகிறது. இதில், அமைச்சரின் அழுத்தம் காரணமாக, இந்த ஆண்டு அரசிடம் இருந்து சந்தனக் கட்டையை பெறப்போவது இல்லை என்றும், 2012-க்கு முன்பு இருந்தபடி, பக்தர்களிடம் இருந்து சந்தனக் கட்டைகள் கேட்டுப் பெறுவது என்றும் முடிவெடுக்க உள்ளதாக தகவல் வெளியாகி உள்ளது.