அமைச்சர் ரமேஷ் | கோப்புப் படம்
சென்னை: ‘கந்தசஷ்டி விழாவில் அனைத்து முருகன் கோயில்களில் தமிழுக்கு முதன்மை இடம் வழங்க வேண்டும். முதியோர், கர்ப்பிணிகள், மாற்றுத் திறனாளிகள் எளிதில் தரிசனம் செய்ய தனி ஏற்பாடு செய்ய வேண்டும்’ என்று இந்து சமய அறநிலையத்துறை அமைச்சர் ரமேஷ் உத்தரவிட்டுள்ளார்.
இதுகுறித்து அதிகாரிகளுக்கு அவர் வெளியிட்டுள்ள உத்தரவில் கூறியிருப்பதாவது: முருகன் கோயில்களில் கந்தசஷ்டி விழாவின் அனைத்து நாட்களிலும் பக்தர்கள் நீண்டநேரம் காத்திருக்காமல் சிரமமின்றி தரிசனம் செய்ய தேவையான ஏற்பாடுகளைச் செய்ய வேண்டும். மூத்த குடிமக்கள், கர்ப்பிணிகள் மற்றும் மாற்றுத் திறனாளிகள் நீண்டநேரம் காத்திருக்காமல் எளிதில் தரிசனம் செய்யத் தனி ஏற்பாடு செய்ய வேண்டும். இவர்களுக்கு உதவுவதற்காகப் போதிய தன்னார்வலர்கள் மற்றும் கோயில் பணியாளர்களை நியமிக்க வேண்டும்.
சூரசம்ஹாரம் நடைபெறும்: நாளில் எதிர்பார்க்கப்படும் பக்தர்கள் கூட்டத்தைக் கருத்தில்கொண்டு விரிவான கூட்ட நெரிசல் மேலாண்மைத் திட்டம் தயாரிக்க வேண்டும். தேவையான இடங்களில் தடுப்புகள், கண்காணிப்பு கேமராக்கள், அறிவிப்புக் கருவிகள் மற்றும் வழிகாட்டும் பலகைகள் அமைக்க வேண்டும்.
அனைத்து கோயில் பணியாளர்களும், எந்தச் சூழ்நிலையிலும் பக்தர்களிடம் கடுமையாகப் பேசுவதோ, முறையற்ற வகையில் நடந்து கொள்வதோ அனுமதிக்கப்படாது. அனைத்து முக்கிய முருகன் கோயில்களிலும் ஓதுவார்களைக் கொண்டு தமிழில் திருப்புகழ், திருமுறை, கந்தசஷ்டி பாராயணம் நடத்த வேண்டும்.
அனைத்து வழிபாட்டு நிகழ்ச்சிகள், பூஜைகள் மற்றும் விழா நிகழ்வுகளிலும் தமிழுக்கு முதன்மையான இடம் வழங்கப்பட வேண்டும். கோயில் ஒலிபெருக்கிகளில் திருப்புகழ், தேவாரம், திருமுறை மற்றும் முருக பக்திப் பாடல்களை ஒலிபரப்ப ஏற்பாடு செய்ய வேண்டும். பக்தர்களின் வசதி, பாதுகாப்பு, மரியாதை மற்றும் தமிழ் வழிபாடு ஆகியவற்றில் எந்தவிதமான குறைபாடுகளும் இருக்கக் கூடாது. இவ்வாறு அதில் கூறப்பட்டுள்ளது.