பசும்பொன்னில் உள்ள தேவர் நினைவிடத்தில் மாலை அணிவித்து மரியாதை செலுத்திய திமுக தலைவர் மற்றும் முன்னாள் முதல்வர் மு.க.ஸ்டாலின். உடன் கட்சி நிர்வாகிகள்.
மதுரை: விடுதலைப் போராட்ட வீரர் பசும்பொன் முத்துராமலிங்கத் தேவரின் பிறந்த நாள் மற்றும் குருபூஜையையொட்டி அவரது நினைவிடத்தில் குடியரசுத் துணைத் தலைவர் சி.பி.ராதாகிருஷ்ணன், ஆளுநர் அர்லேகர், தமிழக அமைச்சர்கள் மற்றும் ஸ்டாலின், பழனிசாமி உள்ளிட்ட பல்வேறு கட்சித் தலைவர்கள், பொதுமக்கள் மரியாதை செலுத்தினர்.
பசும்பொன் முத்துராமலிங்கத் தேவரின் 119-வது பிறந்தநாள் மற்றும் 64-வது குருபூஜை விழா, ராமநாதபுரம் மாவட்டம் கமுதி அருகேயுள்ள பசும்பொன்னில் நேற்று நடைபெற்றது. இந்நிகழ்ச்சியில் குடியரசுத் துணைத் தலைவர் சி.பி.ராதாகிருஷ்ணன், ஆளுநர் ராஜேந்திர விஸ்வநாத் அர்லேகர், முன்னாள் மத்திய அமைச்சர் பொன்.ராதாகிருஷ்ணன் ஆகியோர் தேவர் நினைவிடத்தில் மாலை அணிவித்து மரியாதை செலுத்தினர். பின்பு, தேவர் வாழ்ந்த வீட்டை அவர்கள் பார்வையிட்டனர்.
தமிழக அரசு சார்பில் அமைச்சர்கள் நிர்மல்குமார், மதன்ராஜா, வி.கே.ராஜீவ், ராமநாதபுரம் மாவட்ட ஆட்சியர் சிவகுரு பிரபாகரன் ஆகியோர் தேவர் நினைவிடத்தில் மாலை அணிவித்து மரியாதை செலுத்தினர். அமைச்சர் நிர்மல்குமார் கூறும்போது, “முதல்வர் விஜய் சென்னை நந்தனத்தில் உள்ள தேவர் சிலைக்கு மாலை அணிவித்து மரியாதை செலுத்தினார். பசும்பொன் தேவர் நினைவிடத்துக்கு முதல்வர் விரைவில் வருவார்” என்றார். பல்வேறு அரசுத் துறைகளின் சார்பில் 194 பயனாளிகளுக்கு ரூ.79.70 லட்சம் மதிப்பில் நலத்திட்ட உதவிகள் வழங்கப்பட்டன.
திமுக தலைவரும் முன்னாள் முதல்வருமான மு.க.ஸ்டாலின், தேவர் நினைவிடத்தில் மரியாதை செலுத்தினார். அவருடன் முன்னாள் அமைச்சர்கள் சாத்தூர் ராமச்சந்திரன், தங்கம் தென்னரசு, ராஜகண்ணப்பன், பெரியகருப்பன், மூர்த்தி, எம்எல்ஏக்கள் காதர்பாட்சா என்ற முத்துராமலிங்கம், செந்தில்குமார் உள்ளிட்டோர் பங்கேற்றனர்.
அதிமுக சார்பில் அக்கட்சியின் பொதுச் செயலாளரும் முன்னாள் முதல்வருமான பழனிசாமி, தேவர் நினைவிடத்தில் மாலை அணிவித்து மரியாதை செலுத்தினார். அவருடன், முன்னாள் அமைச்சர்கள் திண்டுக்கல் சீனிவாசன், ஓ.எஸ்.மணியன், செல்லூர் ராஜூ, ஆர்.பி.உதயகுமார், காமராஜ், மணிகண்டன், ராஜேந்திர பாலாஜி, அதிமுக அமைப்புச் செயலாளர் ராஜன் செல்லப்பா, தர்மர் எம்பி உள்ளிட்டோர் பங்கேற்றனர்.
காங்கிரஸ் சார்பில் சுற்றுலாத் துறை அமைச்சர் ராஜேஷ்குமார், முன்னாள் எம்பி திருநாவுக்கரசர் ஆகியோரும், அமமுக பொதுச் செயலாளர் டிடிவி.தினகரன், மதிமுக பொதுச்செயலாளர் வைகோ, நாதக ஒருங்கி்ணைப்பாளர் சீமான், வி.கே.சசிகலா, தமிழ்நாடு கொங்கு இளைஞர் பேரவை நிறுவனர் தனியரசு, தமிழ்நாடு அனைத்து விவசாயிகள் சங்கங்களின் ஒருங்கிணைப்புக் குழு தலைவர் பிஆர்.பாண்டியன், பாமக மாநிலப் பொருளாளர் திலகபாமா, மதுரை ஆதீனம் ஹரிஹர ஞானசம்பந்த தேசிக பரமாச்சாரிய சுவாமிகள், வீ த லீடர்ஸ் அமைப்பினர் மற்றும் பல்வேறு அரசியல் கட்சியினர் மரியாதை செலுத்தினர்.
சென்னை நந்தனத்தில் உள்ள முத்துராமலிங்கத் தேவர் சிலைக்கு முதல்வர் விஜய் மாலை அணிவித்து மரியாதை செலுத்தினார். படம்: எல்.சீனிவாசன்
தமிழகம் முழுவதும் இருந்து வந்திருந்த ஆயிரக்கணக்கானோர் தேவர் நினைவிடத்தில் மரியாதை செலுத்தினர். சிலர் அலகு குத்தியும், காவடி எடுத்து வந்தும், முளைப்பாரிகள் எடுத்தும் நேர்த்திக்கடன் செலுத்தினர். தேவர் ஜெயந்தியை முன்னிட்டு தென்மண்டல ஐஜி விஜயேந்திர பிதாரி தலைமையில் மாவட்டம் முழுவதும் 10 ஆயிரத்துக்கும் மேற்பட்ட போலீஸார் பாதுகாப்புப் பணியில் ஈடுபடுத்தப்பட்டனர்.
சென்னையில் முதல்வர் மரியாதை: சென்னை நந்தனத்தில் உள்ள முத்துராமலிங்கத் தேவரின் சிலைக்கு முதல்வர் விஜய் மாலை அணிவித்து மரியாதை செலுத்தினார். சட்டப்பேரவை தலைவர் ஜேசிடி பிரபாகர், அமைச்சர்கள் என்.ஆனந்த், ஆதவ் அர்ஜுனா, செங்கோட்டையன், வெங்கடரமணன், ராஜ்மோகன், மரிய வில்சன் தமிழ் வளர்ச்சித் துறை செயலர் வே.ராஜாராமன், செய்தி மக்கள் தொடர்புத் துறை இயக்குநர் அருண் தம்புராஜ் உள்ளிட்டோரும் மரியாதை செலுத்தினர்.
தமிழக காங்கிரஸ் முன்னாள் தலைவர் கே.வி.தங்கபாலு, தேமுதிக பொதுச்செயலாளர் பிரேமலதா விஜயகாந்த், பாஜக மூத்த தலைவர் தமிழிசை சவுந்தரராஜன், தமாகா தலைவர் ஜி.கே.வாசன், திமுக சார்பில் டி.ஆர்.பாலு, அதிமுக அவைத் தலைவர் தமிழ்மகன் உசேன் உள்ளிட்டோரும் முத்துராமலிங்கத் தேவரின் சிலைக்கு மரியாதை செலுத்தினர்.