சென்னை: சென்னை கே.கே.நகரைச் சேர்ந்த பாலசுப்பிரமணியன் என்பவர் சென்னை உயர் நீதிமன்றத்தில் தாக்கல் செய்திருந்த மனுவில், ‘உடல்நலம் சரியில்லாத எனது மனைவியுடன் முன்பதிவு செய்த படுக்கை வசதி கொண்ட ரயில் பெட்டியில் பயணித்தேன்.
ஆனால் படுக்கை வசதியை இரவு 10 முதல் காலை 6 மணி வரை மட்டுமே பயன்படுத்த முடியும் என்ற விதி காரணமாக எனது மனைவி அந்த காலநேரத்தை தாண்டி படுக்கை வசதியை பயன்படுத்த சக பயணிகள் அனுமதிக்கவில்லை.
இதனால் எனது மனைவி உடல் ரீதியாகவும், மன ரீதியாகவும் அவதியடைந்தார். எனவே ரயில்வே வணிக கையேட்டில் உள்ள விதிகளை ரத்து செய்ய வேண்டும்’ எனக் கோரியிருந்தார். இந்த வழக்கை விசாரித்த தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள் முருகன் ஆகியோர் அடங்கிய அமர்வு பிறப்பித்துள்ள உத்தரவில், “தனிப்பட்ட சம்பவத்தைக் காரணம் காட்டி அனைத்து பயணிகளின் வசதிக்காக ரயி்ல்வே நிர்வாகம் கொண்டு வந்துள்ள விதிகளை ரத்து செய்ய முடியாது.
அதேநேரம் உடல்நலம் பாதிக்கப்பட்டவர்கள், மாற்றுத்திறனாளிகள் மற்றும் கர்ப்பிணி பெண்களுக்கு படுக்கை வசதி கொண்ட ரயில் பெட்டிகளில் அவர்களுக்கான வசதிகள் முறையாக கிடைப்பதை ரயில்வே நிர்வாகம் உறுதி செய்ய வேண்டும். மனுதாரர் புகார் தெரிவித்து இருந்தால் அதன்மீது மேல் நடவடிக்கை எடுக்கும்படி ரயில்வே நிர்வாகத்தை கோரலாம்”என உத்தரவிட்டு வழக்கை முடித்து வைத்துள்ளனர்.