உயர் நீதிமன்ற மதுரை அமர்வு
மதுரை: கோயில் அறங்காவலர்கள் பதவிக்கான விண்ணப்பங்களை வலைதளத்தில் பதிவேற்றம் செய்யும் வகையில் விதிகளில் திருத்தம் செய்யவோ அல்லது புதிதாக விதிகளை உருவாக்கவோ தமிழக அரசு நடவடிக்கை எடுக்க வேண்டும் என உயர் நீதிமன்றம் உத்தரவிட்டது.
தூத்துக்குடி மாவட்டம் திருச்செந்தூரைச் சேர்ந்த ராம்குமார் ஆதித்தன், உயர் நீதிமன்ற மதுரை அமர்வில் தாக்கல் செய்த மனு: கோயில்களில் அறங்காவலர்கள் பதவிக்கு விண்ணப்பிப்போரின் விண்ணப்பங்கள், அவர்கள் தொடர்பான அனைத்து ஆவணங்களும் அறநிலையத்துறை வலைதளத்தில் பதிவேற்றம் செய்யப்பட வேண்டும். அதே போல் அறங்காவலராகத் தேர்வு செய்யப்பட்டவர் எதற்காக தேர்வு செய்யப்பட்டார் என்ற காரணத்தை வெளிப்படையாகத் தெரிவிக்க வேண்டும்.
எனவே, கோயில் அறங்காவலர் தேர்வு, நியமன உத்தரவுகளை அறநிலையத்துறை மற்றும் சம்பந்தப்பட்ட கோயில்களின் வலைதளத்தில் வெளியிடவும், அறங்காவலர் நியமன உத்தரவு வலைதளத்தில் பதிவேற்றம் செய்யப்பட்ட நாளிலிருந்து நியமனத்துக்கு எதிராக மேல்முறையீடு செய்வதற்கான காலக்கெடு நிர்ணயம் செய்யவும் உத்தரவிட வேண்டும். இவ்வாறு மனுவில் கூறப்பட்டிருந்தது.
இந்த மனு நீதிபதிகள் பி.வேல்முருகன், பி.முருகன் அமர்வில் விசாரணைக்கு வந்தது. அறநிலையத்துறை சார்பில், அறங்காவலர்கள் பதவிக்கான விண்ணப்பங்களை வலைதளத்தில் பதிவேற்றம் செய்ய விதிகளில் இடம் இல்லை எனக் கூறப்பட்டது.
பின்னர் நீதிபதிகள், அறங்காவலர்கள் கோயில் பணம், சொத்து, நகைகளை அபகரித்ததாகச் செய்திகள் உள்ளன. கோயில் சொத்துகளை விற்பனை செய்தும் உள்ளனர். இதனால் அறங்காவலர் தேர்வு நேர்மையாகவும், வெளிப்படையாகவும் நடைபெற வேண்டும். அறங்காவலர்கள் பதவிக்கு விண்ணப்பிப்போரின் விண்ணப்பங்கள் மக்கள் பார்வையிட வசதியாக பொதுவெளியில் பதிவிட்டால்தான் விண்ணப்பித்தோர் பற்றிய தகவல்கள் தெரிவித்து பொதுமக்கள் ஆட்சேபம் இருந்தால் தெரிவிக்க முடியும்.
அரசிடம் அறங்காவலர் பற்றிய அனைத்துத் தகவல்களும் இருக்காது. எனவே, அறங்காவலர் விண்ணப்பங்கள், அறங்காவலர் தேர்வுக்கான காரணங்கள் மற்றும் அறங்காவலரை தேர்வு செய்த அரசு உத்தரவை வலைதளத்தில் பதிவேற்றம் செய்யும் வகையில் விதிகளில் திருத்தம் அல்லது புதிய விதிகள் வகுக்க வேண்டும். மனு முடிக்கப்படுகிறது என உத்தரவிட்டனர்.