உயர் நீதிமன்ற மதுரை அமர்வு
மதுரை: புத்தகக் கொள்முதல் முறைகேடு வழக்கு விசாரணையின் போது, “மூன்று ஐஏஎஸ் அதிகாரிகள், உரிய ஆவணங்களுடன் நேரில் ஆஜராகி விளக்கம் அளிக்க வேண்டும்” என்று உயர் நீதிமன்ற மதுரைக் கிளை உத்தரவிட்டுள்ளது.
தமிழகத்தில் பொது நூலகங்களுக்குப் புத்தகங்கள் கொள்முதல் செய்வது தொடர்பாக உயர் நீதிமன்ற மதுரை அமர்வு 2024-ல் உத்தரவு பிறப்பித்தது. அந்த உத்தரவை அமல்படுத்தாத அப்போதைய நூலகத் துறை இயக்குநர் ஜெயந்தி மற்றும் அதிகாரிகள் மீது நீதிமன்ற அவமதிப்பு நடவடிக்கை எடுக்கக் கோரி, நெல்லையைச் சேர்ந்த ராமசுப்பு என்பவர் உயர் நீதிமன்ற மதுரை அமர்வில் மனு தாக்கல் செய்தார்.
இந்த வழக்கு ஏற்கெனவே விசாரணைக்கு வந்த போது, புத்தகங்கள் கொள்முதல் தொடர்பாக வழக்குப் பதிவு செய்ய லஞ்ச ஒழிப்பு போலீஸாருக்கு உத்தரவிடப்பட்டது. அதன்படி, போலி நூல் சர்ச்சையில் சிக்கிய அகல்விளக்கு பதிப்பகத்தின் உரிமையாளர் மோகன் உள்ளிட்டோர் மீது வழக்குப் பதிவு செய்யப்பட்டது. பதிப்பகத்தின் வங்கிக் கணக்குகள் முடக்கப்பட்டன.
இந்த வழக்கு நீதிபதிகள் ஜி.ஆர்.சுவாமிநாதன், எம்.டி.சுமதி ஆகியோர் அடங்கிய அமர்வில் நேற்று விசாரணைக்கு வந்தது. அப்போது அரசு தரப்பில், “நூலக கொள்முதலில் லஞ்ச ஒழிப்பு போலீஸார் விசாரணை தொடர்பாகச் சென்னை உயர் நீதிமன்றத்தில் மனு தாக்கல் செய்து விசாரணைக்கு எடுக்கப்பட்டு தள்ளி வைக்கப்பட்டுள்ளது” என்று கூறப்பட்டது.
அதற்கு நீதிபதிகள், “வழக்குப் பதிவு செய்வது தொடர்பான கோரிக்கைகளைச் சென்னை உயர் நீதிமன்றம் விசாரிக்கட்டும். நீதிமன்ற அவமதிப்பு மட்டும் இங்கு விசாரிக்கப்படும். இந்த வழக்கு தொடர்பாக 5 பேர் பணியிடை நீக்கம் செய்யப்பட்டுள்ளனர். புத்தகக் கொள்முதலுக்குப் பொறுப்பானவர் ஒருவர் இருப்பார். அவர் யார் என்பதை தெரிவிக்க வேண்டும்” என்றனர்.
அரசு தரப்பில், “புத்தகங்கள் கொள்முதலுக்கு நூலகத் துறை இயக்குநர் ஜெயந்திதான் பொறுப்பு” என கூறப்பட்டது. “அவர் மீது மட்டும் நீதிமன்ற அவமதிப்பு நடவடிக்கை எடுக்கப்படும். இதுமட்டுமின்றி, அவர் மீது பல்வேறு குற்றச்சாட்டுகள் உள்ளன. அவருக்காக அரசு தரப்பில் யாரும் ஆஜராக வேண்டாம்” என நீதிபதிகள் கூறினர்.
இந்த வழக்கில் பணியிடை நீக்கம் செய்யப்பட்டுள்ள சென்னை அண்ணா நூலக தலைமை நூலகர் காமாட்சி தரப்பில் ஆஜரான மூத்த வழக்கறிஞர், “ஒருங்கிணைப்புக் குழுத் தலைவராகக் காமாட்சி இருந்துள்ளார். அவருக்கும் கொள்முதலுக்கும் எந்த சம்பந்தமும் கிடையாது. 137 பேர் கொண்ட பரிந்துரை குழு அளிக்கும் தகவல்களை உயர்மட்டக் குழுவுக்கு அனுப்பும் பணியை மட்டுமே செய்துள்ளார். அவரைப் பணியிடை நீக்கம் செய்துள்ளனர். முறைகேட்டில் தொடர்புடைய உயர் அதிகாரிகள் மீது நடவடிக்கை எடுக்கவில்லை. கீழ்நிலை அலுவலர்கள் மீது மட்டும் நடவடிக்கை எடுக்கப்பட்டுள்ளது” என்றார்.
அப்போது நீதிபதிகள், காமாட்சி எத்தனை ஆண்டுகளாக நூலகராக பணிபுரிகிறார் என்று கேள்வி எழுப்பினர். அதற்கு, காமாட்சி 19 ஆண்டுகளாகப் பணிபுரிந்து வருகிறார் என தெரிவிக்கப்பட்டது. தொடர்ந்து நீதிபதிகள், “இத்தனை ஆண்டுகள் பணிபுரிந்திருக்கிறார் என்றால் புத்தகத்தை முகர்ந்து பார்த்தாலே அது போலி புத்தகம் என்பதை கண்டுபிடித்திருக்கலாமே. எழுத்தாளர் பெருமாள் முருகனால் போலி புத்தகங்களைக் கண்டறிய முடியும் போது உங்களால் முடியாதா?” என்றனர்.
அதற்கு காமாட்சி தரப்பு வழக்கறிஞர், “பெருமாள் முருகனும் தேர்வுக் குழுவில் இருந்தார். அவரும் அகல்விளக்கு புத்தகங்களைப் பரிந்துரை செய்திருக்கிறார். அதற்கு ஆதாரம் உள்ளது” என்றார். அதற்கு, “பெருமாள் முருகன் மீது குற்றம் சாட்டுவது சரியல்ல” என நீதிபதிகள் கூறினர்.
அதற்கு, “அவரை வேண்டும் என்றால் பிரமாண பத்திரம் தாக்கல் செய்யச் சொல்லுங்கள். பரிந்துரை செய்யப்பட்ட புத்தகங்களின் பட்டியலை உயர்மட்டக் குழுவுக்கு அனுப்பியது மட்டுமே காமாட்சியின் பணி. இதுதொடர்பான மின்னஞ்சலை ஆய்வு செய்தால் அனைத்து விவரங்களையும் தெரிந்து கொள்ளலாம். உண்மையான குற்றவாளிகளையும் கண்டுபிடித்து விடலாம்” என காமாட்சி தரப்பில் கூறப்பட்டது.
தமிழக அரசு தரப்பில், “பரிந்துரைக் குழுவால் 26,000 புத்தகங்கள் பரிந்துரை செய்யப்பட்டன. இப்பட்டியலில் பரிந்துரை செய்யப்படாத பல புத்தகங்களை ஒருங்கிணைப்புக் குழு சேர்த்து உயர்மட்டக் குழுவுக்கு அனுப்பியுள்ளது. பெரியார் அறிவுலக நூலகம் தொடர்பாக மட்டுமே தற்போது விசாரணை நடைபெற்று வருகிறது. பிற நூலகங்களில் இருந்து விவரங்கள் கேட்கப்பட்டுள்ளன.
அகல் விளக்கு பதிப்பகத்தின் மோகனுடைய மற்றொரு வங்கிக் கணக்கு கண்டுபிடிக்கப்பட்டு அதை முடக்க நடவடிக்கை எடுக்கப்பட்டுள்ளது. புத்தகக் கொள்முதல் டெண்டர் ரத்து செய்யப்பட்டுள்ளது. வருங்காலங்களில் புத்தகக் கொள்முதலில் எந்த முறைகேடும் நடைபெறாமல் இருக்க புதிய ஒருங்கிணைந்த புத்தக கொள்முதல் கொள்கை 2 மாதங்களில் வெளியிடப்படும்” என கூறப்பட்டது.
மனுதாரர் தரப்பில், “உயர்மட்டக் குழு இதுவரை வெளிச்சத்துக்கு வரவில்லை. நீதிமன்ற உத்தரவுக்குப் பிறகே குழு உருவாக்கப்பட்டுள்ளது. குழுவினர் நீதிமன்றத்தில் ஆஜராகி எதற்காக சர்ச்சைக்குரிய புத்தகங்களைத் தேர்வு செய்தனர் என்பதை விளக்க வேண்டும். நூலகத் துறை இயக்குநராக இருந்த ஜெயந்தி மீது மட்டும் அல்லாமல் அப்போது நூலகத்துறையின் முக்கிய பொறுப்புகளில் இருந்த ஐஏஎஸ் அதிகாரிகள் சந்திரமோகன், ஆர்த்தி ஆகியோர் மீதும் நீதிமன்ற அவமதிப்பு நடவடிக்கை எடுக்க வேண்டும்” என வாதிடப்பட்டது.
இதையடுத்து நீதிபதிகள், “ஐஏஎஸ் அதிகாரிகள் சந்திரமோகன், ஜெயந்தி, ஆர்த்தி ஆகியோர் நீதிமன்ற உத்தரவை நிறைவேற்றாமல் இருந்ததற்காக உங்கள் மீது ஏன் நீதிமன்ற அவமதிப்பு நடவடிக்கை எடுக்கக் கூடாது என நேரில் ஆஜராகி விளக்கம் அளிக்க வேண்டும். அப்போது புத்தகக் கொள்முதல் தொடர்பான அனைத்து ஆவணங்களையும் தாக்கல் செய்ய வேண்டும். பணியிடை நீக்கம் செய்யப்பட்டவர்கள் உரிய நீதிமன்றத்தை நாடி நிவாரணம் பெறலாம். விசாரணை 4 வாரங்களுக்கு தள்ளி வைக்கப்படுகிறது” என உத்தரவிட்டனர்.
மதுரை எம்.பி.யை குறிப்பிட்டு நீதிபதி நகைச்சுவை
சென்னை புத்தக வெளியீட்டு விழாவில் நீதிபதி ஜி.ஆர்.சுவாமிநாதன் பேசியதை மதுரை எம்.பி., சு.வெங்கடேசன் விமர்சித்து சமூக வலைதளத்தில் கருத்து பதிவிட்டார். ‘சு.வெங்கடேசன் கார்ப்பரேட் நிறுவனத்தைச் சேர்ந்தவர் போல் ஆடம்பர உடை, காலணி அணிந்து ஆடம்பர காரில் ரயில் நிலையம் வந்திறங்கியதைப் பார்த்தேன். நிச்சயமாகப் புத்தக ராயல்டி தொகையைக் கொண்டு இப்படியொரு வாழ்க்கை வாழ முடியாது’ என நீதிபதி குறிப்பிட்டார். இதை தனிமனித தாக்குதல் என குறிப்பிட்ட சு.வெங்கடசேன், தனக்கு சொந்தமாகக் கார் கூட இல்லை என்றும் கூறியிருந்தார்.
இந்நிலையில், நேற்றைய விசாரணையின் போது அண்ணா நூலக நூலகர் காமாட்சி தொடர்பாகப் பேசிய நீதிபதி ஜி.ஆர்.சுவாமிநாதன், ‘காமாட்சி நல்லவர்தானே?’ என அவர் தரப்பில் ஆஜரான மூத்த வழக்கறிஞரிடம் கேட்டார். அதற்கு மூத்த வழக்கறிஞர், ‘நிச்சயமாக காமாட்சி நல்லவர்தான்’ என்றார். உடனே நீதிபதி, ‘ஏன் கேட்கிறேன் என்றால், என் மனைவியின் பெயரும் காமாட்சிதான். இப்போது எனக்கு என்ன பயம் என்றால், இதுகுறித்தும் சு.வி. (சு.வெங்கடேசன்) ஏதாவது பேசிவிடுவாரோ என்பது பற்றிதான்” என நகைச்சுவையாக குறிப்பிட்டார்.