சென்னை: அரசு ஊழியர்கள் தங்கள் சொத்து மற்றும் கடன் விவரங்களை ஐஎப்எச்ஆர்எம்எஸ் (IFHRMS) தளத்தில் அக்டோபர் 31-ம் தேதிக்குள் கட்டாயம் பதிவு செய்ய வேண்டும் என்று தமிழக அரசு உத்தரவிட்டுள்ளது.
இதுகுறித்து, தமிழக அரசு தலைமைச் செயலர் சாய்குமார், அனைத்து துறைகளின் செயலர்களுக்கும் அனுப்பிய சுற்றறிக்கை:
தமிழ்நாடு அரசுப் பணியாளர்களுக்கான நடத்தை விதிகள் 1973-ல் மேற்கொள்ளப்பட்ட திருத்தத்தின் அடிப்படையில், அரசு ஊழியர்கள் தங்களிடம் உள்ள அசையும் மற்றும் அசையா சொத்துகள், கடன்கள், இதர பொறுப்புகள் குறித்த விவரங்களை ஆண்டுதோறும் தாக்கல் செய்ய வேண்டும்.
அதன்படி, ஒருங்கிணைந்த நிதி மற்றும் மனிதவள மேலாண்மை அமைப்பான ஐஎப்எச்ஆர்எம்எஸ் இணையதளத்தில் சொத்துகள் மற்றும் கடன்கள் குறித்த விவரங்களை ஆன்லைனில் தாக்கல் செய்வதற்கான வசதி ஏற்படுத்தப்பட்டுள்ளது.
இதில் நிலம், கட்டிடம், அடுக்குமாடிக் குடியிருப்பு, தனி வீடு உள்ளிட்ட அசையா சொத்துகளின் விவரங்களையும், நகை, வங்கி வைப்புகள் வாகனங்கள் உள்ளிட்ட அசையும் சொத்துகளின் விவரங்களையும் பதிவு செய்ய வேண்டும். கடன்கள் மற்றும் இதர பொறுப்புகள் குறித்த விவரங்களையும் பதிவு செய்ய வேண்டும்.
அகில இந்தியப் பணி அலுவலர்களை தவிர்த்து, தங்கள் நிர்வாக கட்டுப்பாட்டில் உள்ள அரசு ஊழியர்கள் 2025 டிசம்பர் 31-ம் தேதி நிலவரப்படி உள்ள சொத்துகள், கடன்கள் குறித்த அறிக்கையை அக். 31-க்குள் தாக்கல் செய்ய வேண்டும்.
வரும் காலங்களில் ஒவ்வொரு ஆண்டும் டிசம்பர் 31-ம் தேதி நிலவரப்படி உள்ள சொத்துகள் கடன்கள் குறித்த அறிக்கையை, அடுத்த ஆண்டு மார்ச் 31-ம் தேதிக்குள் தவறாமல் தாக்கல் செய்ய வேண்டும்.