சென்னை: தமிழகத்தில் இயங்கும் கூட்டுறவு நூற்பாலைகளின் உற்பத்தித்திறனை அதிகரிக்க புதிய இயந்திரங்கள், உதிரி பாகங்கள் கொள்முதல் செய்ய ரூ.14 கோடி ஒதுக்கீடு செய்து அரசு ஆணையிட்டுள்ளது.
இதுகுறித்து அரசு நேற்று வெளியிட்ட செய்திக்குறிப்பில் கூறியிருப்பதாவது: தமிழக சட்டப் பேரவையில் 2026-27-ம் ஆண்டுக்கான கைத்தறி மற்றும் துணிநூல் துறை மானியக் கோரிக்கையில் அமைச்சர் விஜய் பாலாஜி பேசும்போது, தமிழகத்தில் துணிநூல் துறையின்கீழ் இயங்கிவரும் ஆறு கூட்டுறவு நூற்பாலைகளைச் சீரமைக்க விரிவான திட்ட அறிக்கை தயாரிக்கப்பட்டு, புதிய இயந்திரங்கள் மற்றும் அத்தியாவசிய உதிரி பாகங்கள் தேசிய கூட்டுறவு வளர்ச்சிக் கழக நிதியுதவியுடன் கொள்முதல் செய்யப்படும் என்று அறிவித்திருந்தார்.
இந்த அறிவிப்புக்கிணங்க கூட்டுறவு நூற்பாலைகளின் நலன் கருதி, துணிநூல் துறையின் கீழ் இயங்கும் ஆறு கூட்டுறவு நூற்பாலைகளின் உற்பத்தித் திறன் மற்றும் தரத்தினை அதிகரிக்க, புதிய இயந்திரங்கள் மற்றும் இயந்திர உதிரி பாகங்கள் ரூ.14 கோடி மதிப்பில், தேசிய கூட்டுறவு வளர்ச்சிக் கழக நிதியுதவியுடன், கொள்முதல் செய்ய அரசால் ஆணையிடப்பட்டுள்ளது. இவ்வாறு அதில் கூறப்பட்டுள்ளது.