சென்னை ஊழல் தடுப்பு சிறப்பு நீதிமன்றத்தில் நேற்று சரணடைய வந்த முன்னாள் எம்எல்ஏ முத்துக்குமார்.
சென்னை: ரூ.400 கோடி மோசடி வழக்கில் தலைமறைவாக இருந்த முன்னாள் எம்எல்ஏ-வும், அன்பில் மகேஸின் நெருங்கிய நண்பருமான முத்துக்குமார் நேற்று சென்னை ஊழல் தடுப்பு சிறப்பு நீதிமன்றத்தில் சரண் அடைந்தார். அதையடுத்து அவரை வரும் நவ.12 வரை நீதிமன்ற காவலி்ல் சிறையில் அடைக்க நீதிபதி உத்தரவிட்டுள்ளார்.
கடந்த திமுக ஆட்சி காலத்தில் தனியார் பள்ளிகளுக்கு நிரந்தர அங்கீகாரம் உள்ளிட்ட அனுமதிகளை வழங்க கட்சி நிதி என்ற பெயரில் சுமார் ரூ. 400 கோடிக்கு மேல் லஞ்சம் வசூலித்து மோசடி செய்ததாக தனியார் பள்ளிகள் சங்க நிர்வாகிகள் தரப்பில் அளிக்கப்பட்ட புகாரின்பேரில் அப்போதைய பள்ளி கல்வித்துறை அமைச்சர் அன்பில் மகேஸ், பெற்றோர் ஆசிரியர் சங்கத் தலைவரான பி.டி. அரசகுமார், சங்க மாநில பொருளாளரும், விருத்தாச்சலம் தொகுதி முன்னாள் எம்எல்ஏ-வும், அன்பில் மகேஸின் நெருங்கிய நண்பருமான வி. முத்துக்குமார் மற்றும் ராஜா, சுரேஷ், தினேஷ் உள்ளிட்டோருக்கு எதிராக சென்னை மத்திய குற்றப்பிரிவு போலீஸார் வழக்குப்பதிவு செய்துள்ளனர்.
இதில் ஏற்கெனவே பி.டி.அரசகுமார், ராஜா, சுரேஷ் ஆகியோர் கைது செய்யப்பட்டு ஜாமீனில் விடுவிக்கப்பட்டனர். இந்நிலையில் இந்த வழக்கில் முன்னாள் அமைச்சர் அன்பில் மகேஸ் கடந்த அக்.26 அன்று கைது செய்யப்பட்டு சிறையில் அடைக்கப்பட்டுள்ளார்.
இந்நிலையில் இந்த வழக்கில் தொடர்ந்து தலைமறைவாக இருந்த முன்னாள் எம்எல்ஏ-வான முத்துக்குமார், தினேஷ் ஆகியோர் தாக்கல் செய்திருந்த முன்ஜாமீன் மனுவை உச்ச நீதிமன்றம் தள்ளுபடி செய்த நிலையில், முத்துக்குமார் நேற்று சென்னை ஊழல் தடுப்பு சிறப்பு நீதிமன்றத்தில் நீதிபதி எல்.எஸ். சத்தியமூர்த்தி முன்பாக சரணடைந்தார்.
அதையடுத்து முத்துக்குமாரை வரும் நவ.12 வரை நீதிமன்ற காவலில் சிறையில் அடைக்கவும், சிறையில் முதல் வகுப்பு வழங்கவும் நீதிபதி எல்.எஸ். சத்தியமூர்த்தி உத்தரவிட்டார். அதையடுத்து அவரை போலீஸார் புழல் சிறைக்கு அழைத்து சென்றனர்.