இந்திய - இலங்கை மீனவர்கள் பேச்சு நடத்த மத்திய மீன்வளத் துறை செயலரிடம் கோரிக்கை

ராமேசுவரம்: மத்திய மீன்வளத் துறை செயலாளர் அபிலாக்‌ஷ் லிக்கியிடம் தேசிய பாரம்பரிய மீனவர்கள் கூட்டமைப்பு சார்பாக இந்திய - இலங்கை மீனவர்கள் பேச்சுவார்த்தை நடத்த கோரிக்கை வைக்கப்பட்டுள்ளது.

மத்திய மீன்வளத்து றை செயலாளர் அபிலாக்‌ஷ் லிக்கியிடம் தேசிய பாரம்பரிய மீனவர்கள் கூட்டமைப்பு சார்பின் தலைவர் நல்லதம்பி வழங்கிய கடிதத்தில், “இந்திய அரசு தமிழகத்துக்குச் சொந்தமான கச்சதீவை 1974-ம் ஆண்டு இலங்கைக்கு கொடுத்தது. இதனால் கடந்த 52 வருடங்களாக தமிழக மீனவர்கள் துன்பத்தை மட்டுமே அனுபவித்து வருகிறோம்.

இதுவரை சுமார் 560-க்கும் மேற்பட்ட இந்திய மீனவர்கள் இலங்கை கடற்படையால் கொல்லப்பட்டுள்ளார்கள். பல்லாயிரம் கோடி ரூபாய் மதிப்புள்ள மீனவர்களின் உடமைகள் அழிக்கப்பட்டுள்ளன.

இவற்றுக்குத் தீர்வு காணும் பொருட்டு இந்திய - இலங்கை மீனவர்கள் பேச்சுவார்த்தைகள் தொடர்ந்து நடத்தப்பட்டு வந்தன. ஆனால், கடந்த 2016-ம் ஆண்டு முதல் இந்திய - இலங்கை மீனவர்கள் பேச்சுவார்த்தைகள் நடத்தப்படவில்லை. மேலும், கடந்த செப்டம்பர் 25-ம் தேதி நடைபெறுவதாக இருந்த இரு நாட்டு அதிகாரிகள் மட்டத்திலான பேச்சுவார்த்தையும் தடைபட்டுள்ளது.

எனவே, மத்திய அரசு இந்திய - இலங்கை மீனவர்கள் பேச்சுவார்த்தை உடனடியாக நடத்த ஆவன செய்ய வேண்டும். இரு நாட்டு அதிகாரிகள் மட்டத்திலான குழுவில் இந்திய - இலங்கை பாரம்பரிய மீனவர்களையும் உறுப்பினராக சேர்த்துக் கொள்ள வேண்டும். பாக் நீரணை இந்திய - இலங்கை நாடுகளுக்கு இடையிலான குறுகிய கடல் பகுதி ஆக இருப்பதால், பாக் நீரணை கடல் பகுதிகளுக்கு பிரத்தியோக மீன்பிடி அறிவிப்பாணையை உருவாக்க வேண்டும்” என்று கடிதத்தில் கூறப்பட்டுள்ளது.