திருவண்ணாமலை ஊழல் தடுப்பு மற்றும் கண்காணிப்பு பிரிவு காவல் துணை கண்காணிப்பாளர் அலுவலகத்தில் விசாரணைக்கு ஆஜராகி, வெளியே வந்த முன்னாள் அமைச்சர் எ.வ.வேலு.
திருவண்ணாமலை: ஏரியில் முறைகேடாக மண் அள்ளிய வழக்கு தொடர்பாக திமுக முன்னாள் அமைச்சர் எ.வ.வேலுவிடம் லஞ்ச ஒழிப்புப் பிரிவு போலீஸார் விசாரணை நடத்தினர்.
திருவண்ணாமலை மாவட்டம் மலப்பம்பாடி ஏரியில் முறைகேடாக மண் அள்ளப்பட்ட வழக்கின் விசாரணைக்காக திருவண்ணாமலை லஞ்ச ஒழிப்புப் பிரிவு அலுவலகத்தில் திமுக முன்னாள் அமைச்சர் எ.வ.வேல் நேற்று ஆஜரானார்.
அவரிடம் சுமார் ஒரு மணி நேரம் விசாரணை நடைபெற்றது. விசாரணை முடிவுற்ற நிலையில், செய்தியாளர்களிடம் எ.வ.வேலு கூறும்போது, “2025-ம் ஆண்டு டிசம்பர் மாதம் திருவண்ணாமலையில் வடக்கு மண்டல இளைஞர் அணி மாநாடு நடைபெற்றது. அந்த மாநாடு நடைபெற்ற இடம் சமன்செய்ய மலப்பம்பாடி ஏரியில் இருந்து அனுமதியின்றி மண் எடுத்ததாக ஊழல் தடுப்பு பிரிவில் புகார் கொடுக்கப்பட்டுள்ளது. அதனடிப்படையில் என்மீது வழக்கு பதிவு செய்யப்பட்டுள்ளது. இந்த வழக்கு விசாரணைக்கு இன்று நேரடியாக ஆஜராகினேன்.
அவர்களது விசாரணைக்கு முழு ஒத்துழைப்பு அளித்துள்ளேன். தவெக அரசு திட்டமிட்டு என்மீது தவறான, பொய்யான ஒரு வழக்கை பதிவு செய்துள்ளது. நீதிமன்றத்தின் மூலம் நல்ல தீர்ப்பு கிடைக்கும் என்ற நம்பிக்கை உள்ளது. நெடுஞ்சாலை துறையில் ஊழல் நடந்துள்ளதாக அமைச்சர் ஆதவ் அர்ஜூனா கூறிவருகிறார்.
நெடுஞ்சாலைத்துறையில் 2 ஆயிரம் கோடிக்கு மேல் பேட்ச் ஒர்க் ஊழல் நடந்துள்ளதாகவும், இதுகுறித்து லஞ்ச ஒழிப்பு துறையில் ஒப்படைக்க உள்ளோம் என்றும் கூறி வருகிறார். அவர்கள் ஒப்படைக்கட்டும். தவறாக இருந்தால் யாராக இருந்தாலும் தண்டனை அனுபவிக்கட்டும். சாலை பேட்ச் ஒர்க் என்பது அதிகாரி அளவில் நடைபெறுவது தான். எந்த அமைச்சராக இருந்தாலும் விதிகளுக்கு உட்பட்டு தான் எதையும் செய்ய முடியும். தமிழகத்தில் சட்டம்-ஒழுங்கு மிகவும் மோசமாக உள்ளது” என்றார்.