தாராபுரம் சட்டப்பேரவைத் தொகுதிக்கு உள்பட்ட குண்டடம் பகுதியில் நடைபெற்ற தேர்தல் பிரச்சாரத்தில் அதிமுக வேட்பாளர் கே.பானுமதியை ஆதரித்துப் பேசிய அக்கட்சியின் பொதுச் செயலாளர் பழனிசாமி.
தாராபுரம்: விவசாயிகளை ஏமாற்றி தவெக ஆட்சிக்கு வந்ததாக தாராபுரத்தில் நடைபெற்ற தேர்தல் பிரச்சாரத்தில் அதிமுக பொதுச் செயலாளர் பழனிசாமி குற்றம் சாட்டினார்.
தாராபுரத்தில் அதிமுக வேட்பாளர் பானுமதியை ஆதரித்து குண்டடம் பகுதியில் நேற்று அவர் பேசியதாவது: அதிமுக ஆட்சியில் கரேனா காலகட்டத்தில் ரேஷன் கடையில் விலையில்லா அரிசி, விலையில்லா பருப்பு, எண்ணெய் வழங்கப்பட்டது. அந்த ஆண்டில் கடினமான சூழ்நிலையில் அரசுக்கு வருவாய் இல்லாதபோதும் தைப்பொங்கலுக்கு குடும்பத்துக்கு ரூ.2 ஆயிரம் கொடுக்கப்பட்டது. தற்போது நல்ல வருமானம் வரும்போது ரேஷன் கடையில் ஒருவாரம் பொருட்கள் கொடுக்கப்படவில்லை.
கரோனா கால கட்டத்தில் விலை மதிக்கமுடியாத மக்களின் உயிரைக் காப்பாற்றியது அதிமுக அரசு. அனைத்து மாவட்டங்களுக்கும் சுகாதாரத் துறை அதிகாரிகளின் பேச்சைக் கேட்காமல் நானே நேரில் சென்று ஆய்வு நடத்தினேன். விலைமதிக்க முடியாத உயிர்களைக் காப்பாற்றியது அதிமுக அரசு.
தவெக அரசின் தவறான நிர்வாகத்தின் காரணமாக தென்னை விவசாயிகள் பாதிக்கப்பட்டுள்ளனர். தற்போதுதான் தூர்வாருவதற்கு நிதி ஒதுக்கி வருகின்றனர். ஆனைமலையாறு- நல்லாறு திட்டத்தை நிறைவேற்றுவதற்காக நான் கேரளம் சென்றேன். அதன் பிறகு ஆட்சி மாறியதால் அந்தத் திட்டம் கிடப்பில் போடப்பட்டது.
அதிமுக ஆட்சியில் நீடித்திருந்தால் இந்தத் திட்டம் நிறைவேற்றப்பட்டிருக்கும். நீர் மேலாண்மையில் அதிமுக சாதனை படைத்துள்ளது. தவெக ஆட்சியில் விவசாயிகளின் கடன்கள் முழுமையாகத் தள்ளுபடி செய்யவில்லை. மக்களையும், விவசாயிகளையும் ஏமாற்றித்தான் ஆட்சிக்கு வந்தது தவெக அரசு.
தவெக கொடுத்த வாக்குறுதிகளை நிறைவேற்றாமல் மக்களையும், விவசாயிகளையும் ஏமாற்றியது என்பதால் சட்டப்பேரவைத் தேர்தலில் அதிமுகவுக்கு வாக்களிக்க வேண்டும். இவ்வாறு அவர் பேசினார்.