துரைமுருகன்
படம்: வி.எம்.மணிநாதன்
சென்னை: ரூ.4,730 கோடி மணல் குவாரி முறைகேடு புகாரில் முன்னாள் அமைச்சர் துரைமுருகனுக்கு விரைவில் சம்மன் அனுப்பி விசாரணை நடத்த லஞ்ச ஒழிப்புத்துறை முடிவு செய்துள்ளது.
கடந்த திமுக ஆட்சியில் அரசு மணல் குவாரிகளில் வெளிப்படையான ஒப்பந்தப்புள்ளி நடைமுறைகளைப் பின்பற்றாமல் குறிப்பிட்ட நிறுவனங்களுக்கு ஒப்பந்தங்கள் வழங்கியது, அனுமதிக்கப்பட்ட அளவைவிட அதிகமாக மணல் அள்ளியது, போலி அனுமதிச் சீட்டுகள் மூலம் மணல் கடத்தப்பட்டது உள்ளிட்ட முறைகேடுகள் நடந்ததாக அமலாக்கத் துறை குற்றம்சாட்டியிருந்தது. இதனால் அரசுக்கு சுமார் ரூ.4,730 கோடி வருவாய் இழப்பு ஏற்பட்டதாகவும் தெரிவிக்கப்பட்டது.
இதுதொடர்பாக ட்ரோன், செயற்கைக்கோள் படங்கள், ஜியோ ஸ்கேனிங் மற்றும் பொக்லைன் இயந்திரங்களின் ஜிபிஎஸ் தரவுகள் மூலம் அமலாக்கத்துறை ஆய்வு மேற்கொண்டது. மேலும், வழக்குப்பதிவு செய்ய வலியுறுத்தி தமிழக டிஜிபிக்கு கடிதமும் அனுப்பியிருந்தது. இந்நிலையில், ஆட்சி மாற்றத்துக்குப் பிறகு இந்த விவகாரம் மீண்டும் விசாரணைக்கு எடுத்துக்கொள்ளப்பட்டது.
முறைகேடுகள் நடைபெற்றதற்கான முகாந்திரம் இருப்பதாகக் கருதிய லஞ்ச ஒழிப்புத்துறை, முன்னாள் அமைச்சர் துரைமுருகன், ஓய்வுபெற்ற தலைமைப் பொறியாளர்கள் ஏ.முத்தையா, ராமமூர்த்தி உள்ளிட்ட அரசு அதிகாரிகள், தனியார் நபர்கள் மற்றும் நிறுவனங்கள் தொடர்பாக வழக்குப்பதிவு செய்துள்ளது.
இதன் தொடர்ச்சியாக, சென்னை, புதுக்கோட்டை, திருச்சி, கரூர், வேலூர், மதுரை, திண்டுக்கல், கோவை உள்ளிட்ட பகுதிகளில் நீர்வளத்துறை பொறியாளர்கள், ஒப்பந்ததாரர்கள் தொடர்புடைய 34 இடங்களில் லஞ்ச ஒழிப்புத்துறை போலீஸார் நேற்று முன்தினம் சோதனை நடத்தினர்.
இதில் கைப்பற்றப்பட்ட முக்கிய ஆவணங்களை அதிகாரிகள் ஆய்வு செய்துவரும் நிலையில், இந்த வழக்கில் அடுத்தகட்டமாக முன்னாள் அமைச்சர் துரைமுருகனுக்கு சம்மன் அனுப்பி வரவழைத்து, விசாரணை நடத்த லஞ்ச ஒழிப்புத்துறையினர் திட்டமிட்டுள்ளதாகத் தகவல் வெளியாகியுள்ளது.