சென்னை: அரசு ஊழியர்களைப் போல, மாதம்தோறும் முதல் தேதியே சம்பளம் வழங்க வேண்டும் என கோயில் பணியாளர்கள் வலியுறுத்தி உள்ளனர்.
தமிழ்நாடு திருக்கோயில் தொழிலாளர்கள் சங்கம் சார்பில், கோயில் பணியாளர்களின் நலன், உரிமைகளை வலியுறுத்தும் பொதுக்குழுக் கூட்டம், திருவள்ளூர் மாவட்டம் புட்லூரில் மாவட்டத் தலைவர்கள் வெங்கடேசன், முனிரத்தினம் தலைமையில் நேற்று முன்தினம் நடைபெற்றது.
இதில், சங்கத்தின் கொடியை முன்னாள் கொள்கை பரப்புச் செயலாளர் வி.பி.சாமி ஏற்றி வைத்தார்.
இதைத் தொடர்ந்து, சங்கத்தின் மாநிலப் பொதுச் செயலாளர் சு.தனசேகர் பேசியதாவது: தமிழக அரசு கோயில் பணியாளர்களுக்கு நகர ஈட்டுப்படி, வீட்டு வாடகைப்படி ஆகியவற்றை உயர்த்தி வழங்க வேண்டும்.
5 ஆண்டுகள் பணிபுரிந்த தினக்கூலி, தொகுப்பூதியப் பணியாளர்களை நிரந்தரம் செய்ய வேண்டும். தற்போது மாத சம்பளம் கிடைக்க 20-ம் தேதி வரைகூட தாமதமாகிறது.
இந்த நிலையை மாற்றி, மாநில மைய நிதியம் உருவாக்கி, அரசு ஊழியர்கள்போல கோயில் பணியாளர்களுக்கும் ஒவ்வொரு மாதமும் முதல் தேதியிலேயே சம்பளம் வழங்க நடவடிக்கை எடுக்க வேண்டும்.
உள்துறைப் பணியாளர்களுக்கு விடுப்பு ஊதியம் வழங்குவதுடன், ஓய்வுபெற்ற கோயில் பணியாளர்களுக்கு உயர் நீதிமன்றத் தீர்ப்பின்படி ரூ.7,850 ஓய்வூதியத்துடன் அகவிலைப்படியையும் வழங்க தமிழக அரசு நடவடிக்கை எடுக்க வேண்டும் என்றார்.