சுரங்கம் தோண்டும் இயந்திரம் (கோப்புபடம்).
சென்னை: இரண்டாம் கட்ட மெட்ரோ ரயில் திட்டத்தில், கால இழப்பை ஈடுகட்ட கூடுதலாக 4 சுரங்கம் தோண்டும் இயந்திரங்களை வாங்க சென்னை மெட்ரோ ரயில் நிர்வாகம் முடிவு செய்துள்ளது. இதன் மூலமாக, குறித்த காலத்துக்குள் பணிகளை முடிக்க திட்டமிடப்பட்டுள்ளது.
சென்னையில், இரண்டாம் கட்ட மெட்ரோ ரயில் திட்டம் ரூ.63,246 கோடி மதிப்பில், 116.1 கி.மீ. தொலைவில் 3 வழித்தடங்களில் செயல்படுத்தப்படுகிறது. மாதவரம் - சிறுசேரி வரை (45.4 கி.மீ.) 3-வது வழித்தடத்திலும், கலங்கரை விளக்கம் - பூந்தமல்லி வரை (26.1 கி.மீ.) 4-வது வழித்தடத்தி
லும், மாதவரம் - சோழிங்கநல்லூர் வரை (44.6 கி.மீ) 5-வது வழித்தடத்திலும் பணிகள் நடைபெறுகின்றன.
மொத்தம் 118 மெட்ரோ ரயில் நிலையங்கள் அமைக்க திட்டமிட்டு, பணிகள் நடைபெறுகின்றன. இதில், சுமார் 42.6 கி.மீ. சுரங்கப்பாதையில் 43 சுரங்க ரயில் நிலையங்கள் அமைக்கப்படுகின்றன.
மெட்ரோ ரயில் கட்டுமானப் பணி கடந்த 2020-ம் ஆண்டு நவம்பரில் தொடங்கியது. சுரங்கப்பாதை பணியை பொருத்தவரை, மாதவரத்தில் கடந்த 2022-ம் ஆண்டு அக்டோபரில் தொடங்கியது.
இதைத்தொடர்ந்து, பசுமை வழிச்சாலை, கலங்கரை விளக்கம், சேத்துப்பட்டு, பனகல் பூங்கா உட்பட பல்வேறு இடங்களில் சுரங்கப்பாதை பணிகள் தொடங்கின.
மெட்ரோ சுரங்கப்பாதை பணிகளை மேற்கொள்வதற்காக, 23 சுரங்கம் தோண்டும் இயந்திரங்கள் (டிபிஎம் ) அடுத்தடுத்து பயன்படுத்தப்பட்டன. இதைத்தொடர்ந்து, பசுமைவழிச் சாலை - அடையாறு, சேத்துப்பட்டு - ஸ்டெர்லிங் சாலை, அயனாவரம் - பெரம்பூர், பனகல் பூங்கா - கோடம்பாக்கம் சுரங்கப்பாதை பணிகள் அடுத்தடுத்து நிறைவடைந்தன.
ராயப்பேட்டை - ஆர்.கே.சாலை, பசுமை வழிச்சாலை - மந்தைவெளி ஆகிய சுரங்கப்பாதை பணிகளும் நிறைவடைந்தன. இதுதவிர, பல்வேறு இடங்களில் சுரங்கப்பாதை பணிகள் முழுவீச்சில் நடைபெறுகின்றன.
2028-க்குள் திட்டப்பணிகளை முடிக்க இலக்கு நிர்ணயிக்கப்பட்டுள்ளது. இந்த இலக்கை தொய்வின்றி அடையும் வகையில், கூடுதலாக 4 சுரங்கம் தோண்டும் இயந்திரங்களை (டிபிஎம்-கள்) கொள்முதல் செய்ய மெட்ரோ ரயில் நிர்வாகம் முடிவு செய்துள்ளது.
இது குறித்து, சென்னை மெட்ரோ ரயில் நிறுவன அதிகாரிகள் கூறியதாவது: திருமயிலையில் இருந்து ஆழ்வார்பேட்டை வழியாக போட்கிளப் நோக்கி இரண்டு சுரங்கம் தோண்டும் இயந்திரங்கள் (டிபிஎம்) வரவுள்ளன.
ஆழ்வார்பேட்டை, பாரதிதாசன் சாலை ஆகிய மெட்ரோ நிலைய பகுதியில் போதிய இடவசதி இல்லாத குறுகலான சாலைகளாக இருப்பதால், இத்தடத்தின் சுரங்கப் பாதைகள் மற்றும் நிலையங்கள் வழக்கமான பக்கவாட்டு அமைப்பில் இல்லாமல், ஒன்றின் மேல் ஒன்றாக இரண்டு அடுக்கு நிலத்தடி அமைப்பில் கட்டப்படுகின்றன.
எனவே, ஆழ்வார்பேட்டை, பாரதிதாசன் மெட்ரோவில் சுரங்கம் தோண்டும் இயந்திரங்கள் (டிபிஎம்-கள்) எடுக்க முடியாத நிலை இருக்கிறது. இதற்கு அடுத்து போட்கிளப் மெட்ரோவில் தான் டிபிஎம் வெளியே எடுக்க முடியும்.
பனகல் பூங்காவில் இருந்து செல்லும் டிபிஎம் நந்தனத்தை தாண்டி செல்கிறது. போதிய இடமில்லாததால் நந்தனத்தில் டிபிஎம்-மை வெளியே எடுக்க முடியாது. எனவே, இந்த டிபிஎம்-வும் போட்கிளப் மெட்ரோவில் தான் எடுக்க உள்ளோம். திருமயிலை மெட்ரோவில் இருந்து 4-வது வழித்தடத்துக்கான டிபிஎம் நல்ல முறையில் செல்கிறது.
மெட்ரோ நிலைய கட்டுமானப் பணிக்கான ஒப்பந்தத்துக்கு பின்னரே பணி என்பதால், டிபிஎம் இயந்திரங்கள் சுரங்கத்துக்குள்ளேயே 6 முதல் 8 மாதங்கள் வரை காத்திருந்தன.
சுமார் 48 மாதங்களாக உள்ளேயும், வெளியேயும் டிபிஎம்-கள் காத்திருந்தன. மந்தைவெளியில் ஒரு ஆண்டாக இரண்டு டிபிஎம்கள் காத்திருந்தன. இதுதவிர, கெல்லீஸ் - திருவான்மியூர் வரை இருமார்க்கமாக மொத்தம் 24 கி.மீ. சுரங்கப்பாதை பணிக்காக, 48 மாதங்கள் உள்ளேயும், வெளியேயும் டிபிஎம்கள் காத்திருந்தன.
இந்த காத்திருப்பை ஈடுகட்ட, கூடுதலாக 4 சுரங்கம் தோண்டும் இயந்திரங்களை வாங்க முடிவு செய்துள்ளோம். இதற்கான அனுமதி கிடைத்துவிட்டது.
4 டிபிஎம் இயந்திரங்கள் வருவதற்கு 4 மாதங்கள் ஆகும்.
இந்த புதிய டிபிஎம்-களை பூமிக்கடியில் களமிறக்கி, கால இழப்பை ஈடுசெய்து, 2028-ம் ஆண்டுக்குள் அனைத்து பணிகளையும் முடித்து இலக்கை எட்டுவோம். இவ்வாறு அவர்கள் கூறினர்.