சென்னை: நீதிமன்ற வழக்குகளால் 3,644 காவலர்கள் பணியிடங்கள் காலியாக இருப்பதும் 1,299 எஸ்ஐ தேர்வர்கள் பணிவாய்ப்புக்காக காத்திருப்பதும் தொடர்ந்து நீடிக்கிறது. இதனால் இருக்கிற காவலர்களுக்கு பணிச்சுமை அதிகரிப்பதுடன் எஸ்ஐ தேர்வு எழுதி காத்திருப்பவர்களின் எதிர்காலமும் கேள்விக்குறியாகி உள்ளது.
குற்றங்களை கட்டுப்படுத்தவும் சட்டம்-ஒழுங்கை பாதுகாக்கவும் காவல்துறையை உயர் அதிகாரிகள் முடுக்கிவிட்டுள்ளனர். காவல் துறையின் செயல்பாட்டை மேலும் வலுப்படுத்துவதற்கு காலிப்பணியிடங்கள் இடையூறாக உள்ளன. இந்தாண்டு (2026) நிலவரப்படி தமிழக காவல்துறையில்
‘1 லட்சத்து 34,667 பணியிடங்கள் ஒப்பளிக்கப்பட்டுள்ளன. ஆனால், சுமார் 1 லட்சத்து 18,851 பேர் மட்டுமே பணியில் உள்ளனர். இதனால் சுமார் 15 ஆயிரம் பணியிடங்கள் காலியாக உள்ளன. சட்டம் ஒழுங்கு, ரோந்து, குற்றத்தடுப்பு, விசாரணை உள்ளிட்ட பல்வேறு பணிகளை மேற்கொள்ள உரிய எண்ணிக்கையில் காவலர்கள் இல்லை. இதனால் பணியில் இருக்கும் காவலர்களுக்கு பணிச்சுமை அதிகரித்துள்ளது.
இதுதவிர பணிஓய்வு காரணத்தினாலும் காலியிடங்களின் எண்ணிக்கை மாதம்தோறும் அதிகரித்த வண்ணம் உள்ளது. எனவே, புதிய ஆட்களை தேர்வு செய்து பணியில் அமர்த்த வேண்டிய கட்டாயம் அரசுக்கு ஏற்பட்டுள்ளது. ஆனால், காவலர் தேர்வு என்பது உடனடியாக முடியும் பணியல்ல. அறிவிப்பு வெளியிடுதல், எழுத்துத்தேர்வு, உடற்தகுதி தேர்வு, சான்றிதழ் சரிபார்ப்பு, பயிற்சி என பல்வேறு கட்டங்களை கடக்க ஒன்றரை ஆண்டுகளாகும்.
இதற்கிடையே ஏற்கெனவே அறிவிக்கப்பட்ட ஆட்சேர்ப்பு நடவடிக்கைகளும் நீதிமன்ற வழக்குகளால் தாமதமாகி வருகின்றன. தமிழ்நாடு சீருடைப் பணியாளர் தேர்வாணையம் கடந்த ஆண்டு ஆக.21-ம் தேதி 2,833 2-ம் நிலை காவலர்கள், 180 இரண்டாம் நிலை சிறைக் காவலர்கள், 631 தீயணைப்பாளர்கள் என மொத்தம் 3,644 பணியிடங்களுக்கு அறிவிப்பு வெளியிட்டது.
இதற்கான எழுத்துத் தேர்வு நவ.9-ம் தேதியும், உடற்தகுதி தேர்வு இந்தாண்டு ஜன.22 முதல் பிப்.2-ம் தேதி வரையும் நடைபெற்றது. இறுதி கட்-ஆப் மதிப்பெண்கள் வெளியிடப்பட இருந்த நிலையில், நிர்ணயிக்கப்பட்ட உயரத்தில் இருந்து 1 செ.மீ. குறைவாக அனுமதிக்கக் கோரி உச்ச நீதிமன்றத்தில் வழக்கு தொடரப்பட்டது. இதனால் இந்தத் தேர்வு நடவடிக்கை நிலுவையில் உள்ளது.
இதேபோல், 1,299 எஸ்ஐ பணியிடங்களுக்கான அறிவிப்பு கடந்தாண்டு ஏப்.4-ம் தேதி வெளியிடப்பட்டு, எழுத்துத் தேர்வு டிச.21-ம் தேதி நடைபெற்றது. தமிழ்வழி கல்வி இடஒதுக்கீடு தொடர்பான வழக்கு உயர் நீதிமன்றத்தில் நிலுவையில் இருப்பதால் இந்த தேர்வும் அடுத்த கட்டத்துக்கு நகராமல் உள்ளது.
ஒருபுறம் காவல்துறையில் சுமார் 15 ஆயிரம் காலிப்பணியிடங்கள், மறுபுறம் தேர்வு நடைமுறைகள் முடிந்தும் பணியில் சேர முடியாமல் ஆயிரக்கணக்கான தேர்வர்கள் காத்திருக்கும் நிலை என்ற அவல நிலை நீடிக்கிறது.
எனவே, நிலுவையில் உள்ள வழக்குகளை விரைந்து முடித்து, தகுதியான தேர்வர்களை உடனடியாக பணியில் சேர்க்க நடவடிக்கை எடுக்க வேண்டும் என்ற கோரிக்கை வலுத்துள்ளது. எனவே, பணி ஓய்வுபெறும் காவலர்களின் எண்ணிக்கையை கருத்தில் கொண்டு முன்கூட்டியே ஆட்சேர்ப்பு நடவடிக்கைகளை மேற்கொள்வதே காலிப்பணியிடங்களின் அதிகரிப்பை தடுக்க முடியும்.