சென்னை: சாதிப் பெயர்களை நீக்கும் தமிழக அரசின் அரசாணை மீதான தடையை உயர் நீதிமன்ற மதுரை கிளை நீக்கியுள்ளதை தொடர்ந்து, அந்த அரசாணையை உடனே அமல்படுத்த வேண்டும் என்று மார்க்சிஸ்ட் கம்யூனிஸ்ட் கட்சி வலியுறுத்தியுள்ளது.
இதுகுறித்து அக்கட்சியின் மாநிலச் செயலாளர் பெ.சண்முகம் வெளியிட்டுள்ள அறிக்கையில் கூறியிருப்பதாவது: தமிழகத்தில் குடியிருப்பு பகுதிகள், தெருக்கள், சாலைகள், நீர்நிலைகள் மற்றும் பிற பொது நிறுவனங்களின் பெயர்களில் சாதிப் பெயர்கள் இருக்கக் கூடாது என்ற அடிப்படையில் சமூக சீர்திருத்த நோக்கில் தமிழக அரசு கடந்த 2025-ம் ஆண்டு அரசாணை பிறப்பித்தது.
ஆனால் இந்த அரசாணையை எதிர்த்து உயர் நீதிமன்றத்தில் தொடுக்கப்பட்ட வழக்கில் தடை விதிக்கப்பட்டது. சென்னை உயர் நீதிமன்ற மதுரை கிளை தற்போது அந்த தடையை நீக்கி, தமிழக அரசின் அரசாணை செல்லும் என உத்தரவிட்டுள்ளது.
இது வரவேற்கத்தக்கது. தமிழகத்தின் கிராமப்புறங்கள், நகர்ப்புற குடியிருப்பு பகுதிகளில் இன்னும் சாதிப் பெயர்கள் நீடித்துக் கொண்டு தான் இருக்கின்றன.
விருதுநகர் மாவட்டம், ஸ்ரீவில்லிபுத்தூர் தாலுகாவில் சாதியின் பெயரில் பரச்சேரி என்ற கிராமமே உள்ளது. இதன் பெயரை மாற்ற வேண்டுமென அக்கிராம மக்கள் தொடர்ந்து போராடி வருகின்றனர். ஆனால், இன்னும் அந்த கிராமத்தின் பெயர் மாற்றப்படவில்லை.
இதுபோன்ற ஏராளமான கிராமங்கள், நகர்ப்புறங்களில் சாதிப் பெயர்களில் தெருக்கள், சாலைகள் உள்ளன. இத்தகைய பெயர்கள் மறைமுகமாக சாதிய அடையாளங்களையும், பிரிவினைகளையும் ஊக்குவிப்பதாகவே உள்ளது.
எனவே, தமிழக அரசு சாதிப் பெயர்களை நீக்கும் அரசாணையை உடனடியாக அமல்படுத்த வேண்டும். தமிழகம் முழுவதும் சாதிகளின் பெயரில் உள்ள கிராமங்கள், குடியிருப்பு பகுதிகள், தெருக்கள், சாலைகள் ஆகியவற்றை அடையாளங்கண்டு அப்பெயர்களை நீக்கிவிட்டு பொருத்தமான தலைவர்களின் பெயர்களை சூட்ட வேண்டும். இவ்வாறு அவர் வலியுறுத்தியுள்ளார்.