சென்னை: ஒரு லட்சத்துக்கும் மேற்பட்டோருக்கு முழு உடல் பரிசோதனை மேற்கொண்ட ஓமந்தூரார் அரசு பல்நோக்கு உயர் சிறப்பு மருத்துவமனைக்கு இந்திய கம்யூனிஸ்ட் கட்சி பாராட்டு தெரிவித்துள்ளது.
இதுகுறித்து அக்கட்சியின் மாநிலச் செயலாளர் மு.வீரபாண்டியன் வெளியிட்ட அறிக்கையில் கூறியிருப்பதாவது: சென்னை ஓமந்தூரார் பல்நோக்கு உயர் சிறப்பு மருத்துவமனையின் முழு உடல் பரிசோதனை மையத்தில், கடந்த 2018 முதல் ஒரு லட்சத்துக்கும் மேற்பட்டோருக்கு முழு உடல் பரிசோதனைகள் மேற்கொள்ளப்பட்டுள்ளதாக செய்திகள் வெளிவந்துள்ளன.
ரத்தப் பகுப்பாய்வு, புற்றுநோயை தொடக்க நிலையிலேயே கண்டறிவது உட்பட நூற்றுக்கும் மேற்பட்ட பரிசோதனைகள் இம்மருத்துவமனையில் செய்யப்படுவது வரவேற்புக்குரியது.
கரோனா தொற்று காலத்திலும் கூட தொய்வின்றி, இம்மருத்துவமனையின் முழு உடல் பரிசோதனை மையம் சிறப்பாக செயல்பட்டது. மருத்துவமனைக்கும், மருத்துவமனையில் அர்ப்பணிப்போடு பணியாற்றி வரும் மருத்துவர்கள், செவிலியர்கள், மருத்துவப் பணியாளர்கள் அனைவருக்கும் பாராட்டுகள்.
இத்தகைய பரிசோதனை வசதிகளை அனைத்து அரசு மருத்துவக் கல்லூரிகள் மற்றும் மாவட்ட மருத்துவமனைகளிலும் அரசு உருவாக்க வேண்டும். அதேபோல் அரசு மருத்துவமனைகளில் அனைத்து மருத்துவப் பரிசோதனைகளையும், சிகிச்சைகளையும் கட்டணமில்லா சேவையாக வழங்க வேண்டும்.
மேலும் ஓமந்தூரார் பல்நோக்கு உயர் சிறப்பு மருத்துவமனை உட்பட அனைத்து அரசு மருத்துவமனைகளிலும் ஒப்பந்தம் மற்றும் தற்காலிக அடிப்படையில் பணிபுரியும் மருத்துவர்கள், செவிலியர்கள் மற்றும் மருத்துவப் பணியாளர்களுக்கு பணிப் பாதுகாப்பு, சம வேலைக்கு சம ஊதியம் மற்றும் பணிநிரந்தரம் வழங்க தமிழக அரசு முன்வர வேண்டும். இவ்வாறு அவர் கூறியுள்ளார்.