வண்டலூர்: வண்டலூர் அருகே காவல் உயர் பயிற்சியகத்தில் பயிற்சி நிறைவு செய்த டிஎஸ்பி-க்களின் அணிவகுப்பு மரியாதையை ஏற்ற முதல்வர் விஜய் பதக்கங்கள் வழங்கினார்.
காவல் துணைக் கண்காணிப்பாளர் பணியிடத்துக்கு (டிஎஸ்பி) தேர்வு செய்யப்பட்ட 11 பெண்கள், 14 ஆண்கள் என 25 பேர் 52 வார கால அடிப்படைப் பயிற்சியை நிறைவு செய்தனர். இதில் இணையவழிக் குற்றங்கள், சிசிடிஎன்எஸ் செயலாக்கம், டிஜிட்டல் தடயவியல் மற்றும் நவீன தொழில்நுட்பங்களைப் பயன்படுத்துவது, வனப் பயிற்சி, மலையேற்றம், நீச்சல், தற்காப்புக் கலை, யோகா, துப்பாக்கிகளைக் கையாளுதல் உள்ளிட்ட பயிற்சிகளும் வழங்கப்பட்டன.
பயிற்சியில் ஒட்டுமொத்த அளவில் சிறந்து விளங்கிய டி.ஆனீஷ் பிரதீப்புக்கு வீரவாள், முதல்வரின் கோப்பை மற்றும் தங்கப் பதக்கத்தை விஜய் வழங்கினார். ஓ.கார்த்திகாவுக்கு வெள்ளிப் பதக்கமும், பி.எஸ். திவ்யாவுக்கு வெண்கலமும் வழங்கப்பட்டன. முன்னதாக, டிஜிபி மகேஷ் குமார் அகர்வால் முன்னிலையில், பயிற்சி முடித்த அதிகாரிகள் உறுதி ஏற்றனர்.
விழாவில் சட்டப்பேரவைத் தலைவர் ஜே.சி.டி.பிரபாகர், அமைச்சர்கள் சரத்குமார், மரியவில்சன், ரா.குமார், அரசு தலைமைக் கொறடா ரா.சபரிநாதன், தலைமைச் செயலர் சாய்குமார், உள்துறை செயலர் மணிவாசன், பயிற்சியக டிஜிபி (பொ) ராஜீவ் குமார், எம்எல்ஏக்கள் உள்ளிட்டோர் பங்கேற்றனர்.