அதிமுக பொதுச்செயலாளராக இன்று பொறுப்பேற்கிறார் சசிகலா

ஜெயலலிதா, எம்ஜிஆர், அண்ணா நினைவிடங்களில் மரியாதை

அதிமுக பொதுச் செயலாளராக இன்று கட்சியின் தலைமை அலு வலகத்தில் சசிகலா முறைப்படி பொறுப்பேற்கிறார். முன்னதாக நேற்று மாலை ஜெயலலிதா நினை விடத்தில் அஞ்சலி செலுத்திய துடன், எம்ஜிஆர், அண்ணா நினை விடங்களிலும் மரியாதை செலுத்தி னார்.

அதிமுக பொதுச் செயலாளர் மற்றும் தமிழக முதல்வராக இருந்த ஜெயலலிதா கடந்த டிசம்பர் 5-ம் தேதி மறைந்தார். இதையடுத்து, அதிமுக பொதுச் செயலாளர் பதவிக்கு யார் வருவார்கள் என்ற எதிர்பார்ப்பு இருந்தது. ஜெயலலிதாவின் தோழி சசிகலா பொதுச் செயலாளராக முன்னிறுத்தப்பட்டார். நேற்று முன்தினம் நடந்த அதிமுக பொதுக்குழு கூட்டத்தில், தேர்தல் மூலம் பொதுச் செயலாளர் தேர்வு செய்யப்படும் வரை, சசிகலாவை பொதுச் செயலாளராக நியமித்து, ஒருமனதாக தீர்மானம் நிறைவேற் றப்பட்டது. இதைத் தொடர்ந்து, அவர் இன்று காலை 11-ல் இருந்து 2 மணிக்குள் ராயப்பேட்டையில் உள்ள கட்சியின் தலைமை அலு வலகத்தில் பொதுச் செயலாளராக முறைப்படி பொறுப்பேற்கிறார். முன்னதாக அவர் கட்சி அலுவலக வளாகத்தில் உள்ள எம்ஜிஆர் சிலைக்கு மாலை அணிவிக்கிறார். அதன்பின், பொதுச் செயலாளராக பொறுப்பேற்றுவிட்டு, கட்சி நிர்வாகி கள், தொண்டர்கள் மத்தியில் உரையாற்றுகிறார். இதற்கான ஏற்பாடுகளை அதிமுக தலைமை அலுவலகம் செய்து வருகிறது.

இந்நிலையில், நேற்று மாலை அதிமுக பொதுச் செயலாளரான பின் சசிகலா போயஸ்தோட்ட இல் லத்தை விட்டு வெளியில் வந்தார். அவர், அண்ணா, எம்ஜிஆர் மற்றும் ஜெயலலிதா நினைவிடங்களுக்கு சென்று அஞ்சலி செலுத்தினார். முன்னதாக, முதல்வர் ஒ.பன்னீர் செல்வம் தலைமையில் அமைச்சர்கள், அதிமுக எம்எல்ஏக்கள், பொன்னையன் உள்ளிட்ட அதிமுக முக்கிய நிர்வாகிகள், வளர்மதி, கோகுல இந்திரா உள்ளிட்ட முன்னாள் அமைச்சர்கள் மாலை 4 மணிக்கே எம்ஜிஆர் சமாதி அருகில் காத்திருந்தனர். தொடர்ந்து, மாலை 5.15 மணிக்கு எம்ஜிஆர், அண்ணா நினைவு இல்லங்களுக்கு இடையில் அண்ணா சதுக்கம் காவல் நிலை யம் பகுதியில் அமைந்துள்ள பாதை வழியாக சசிகலாவின் வாகனம் வந்தது. அந்த வாகனம் நேராக ஜெயலலிதா சமாதி அருகில் சென் றது. முதல்வர் ஓ.பன்னீர்செல்வம் உள்ளிட்டவர்கள் சசிகலாவை வரவேற்று, ஜெயலலிதா சமாதிக்கு அழைத்துச் சென்றனர்.

மாலை 5.20 மணிக்கு ஜெய லலிதா சமாதியில் சசிகலா மலர் தூவி கண்ணீர் மல்க அஞ்சலி செலுத்தினார். தொடர்ந்து, பொதுக் குழு தீர்மானத்தை வைத்து சாஷ் டாங்கமாக விழுந்து வணங்கினார். பின், ஜெயலலிதா அடக்கம் செய்யப் பட்ட இடத்தைச் சுற்றி வந்தார். அதன்பின், 5.32 மணிக்கு எம்ஜிஆர் நினைவிடம் வந்து, மரியாதை செலுத்தினார். அதன்பின், அங் கிருந்து முதல்வர் ஓ.பன்னீர்செல் வம், அமைச்சர்கள், அதிமுக நிர்வாகிகள் புடைசூழ நடந்தே அண்ணா நினைவிடம் வந்த அவர், மரியாதை செலுத்திவிட்டு, 5.40 மணிக்கு அங்கிருந்து புறப்பட்டார்.

நினைவிடங்களில் சசிகலா வந்த போது, ‘சின்னம்மா வாழ்க’ என சிலர் கோஷம் எழுப்பினர். செல்லும் வழியிலும் கோஷம் எழுப்பப்பட்டது.

ஜெயலலிதாவைப் போல்...

மறைந்த முதல்வர் ஜெயலலிதா, போயஸ் தோட்ட இல்லத்தில் இருந்து தலைமைச் செயலகம் வரும் வழியில், டிஜிபி அலுவல கம், மாநில கல்லூரி, சென்னை பல்கலைக்கழகம், நேப்பியர் பாலம் உள்ளிட்ட பகுதிகளில் கட்சித் தொண்டர்கள் குழுவாக நின்று வணக்கம் தெரிவிப்பார்கள். அதே போன்ற சூழலை நேற்றும் காண முடிந்தது. அண்ணா தொழிற் சங்கத்தை சேர்ந்த தொழிலாளர்கள், பொதுப்பணித்துறை அலுவலகம் முதல், எழிலகம் வரையில் கொடியுடன் நின்று வரவேற்றனர். அதேபோல், சென்னை, திருவள் ளூர், காஞ்சிபுரம் மாவட்ட நிர்வாகி கள் வாகனங்களில் தொண்டர் களை அழைத்து வந்திருந்தனர். அவர்களும் வரவேற்புக்காக அதிமுக கொடியுடன் நிறுத்தப்பட் டிருந்தனர். நினைவிடங்களைக் காண பொதுமக்களும் அதிகளவில் வந்ததால், கூட்டம் நிரம்பி வழிந்தது.

போக்குவரத்து நெரிசல்

அமைச்சர்கள் வாகனங்கள், கட்சி முக்கிய பிரமுகர்கள் வாகனங் கள் காமராஜர் சாலையில் நினை விடங்கள் பகுதியில் நிறுத்தப்பட்ட தாலும், வாகனப் போக்குவரத்தை திருப்பி விட்டதாலும், காமராஜர் சாலையில் போக்குவரத்து நெரிசல் ஏற்பட்டது. நினைவிடங்களுக்கு சசிகலா வந்து விட்டு சென்ற பின்னரும் போக்குவரத்து நெரிசல் சீரடைய ஒரு மணிநேரத்துக்கும் மேலானது.

எம்எல்ஏக்கள் ஆலோசனை

முன்னதாக, அதிமுக தலைமை அலுவலகத்தில் இருந்து எம்எல்ஏக்கள் வாகனத்தில் புறப் பட்டுச் சென்று, சசிகலாவை பின் தொடர்வதாக ஏற்பாடு செய்யப் பட்டிருந்தது. ஆனால், நேற்று மாலை நேரடியாக நினைவிடங் களுக்கு வருமாறு அறிவுறுத்தப் பட்டனர். இதையடுத்து, எம்எல்ஏக்கள் அங்கு வந்தனர். நினைவிடங்களில் மரியாதை செலுத்தி முடிந்ததும், எம்எல்ஏக்கள் கட்சி தலைமை அலுவலகம் வந்து, இன்று நடக்கும் பொதுச் செய லாளர் பதவியேற்பு விழாவில் அவர்களது பணி தொடர்பாக மூத்த நிர்வாகிகளிடம் ஆலோசனை நடத்தி விட்டு சென்றதாக கட்சி வட்டாரங்கள் தெரிவித்தன.