திருவள்ளூர் மாவட்டம், திருமழிசையை சேர்ந்தவர் டி.கே.பரணி(52). கைவினை கலைஞரான இவர், தன் தாத்தா, தந்தை வழியில் அரிசி மற்றும் சந்தன மரத்தில் சிற்பங்கள் உருவாக்கும் பணியில், கடந்த 32 ஆண்டுகளாக ஈடுபட்டு வருகிறார்.
அரை அரிசி முதல், 4 அரிசி வரை பயன்படுத்தி, திருவள்ளுவர், தேச தந்தை மகாத்மா காந்தி உள்ளிட்டோரின் சிற்பங்களை உருவாக்கியுள்ள டி.கே.பரணி, மத்திய, மாநில அரசுகளின் விருதுகளைப் பெற்றுள்ளார்.
இந்நிலையில், விநாயகர் சதுர்த்தி விழாவை முன்னிட்டு, சந்தன மரத்தில் 3.5 செ.மீ. உயரம், 2 செ.மீ. அகலத்தில் கற்பக விருட்ச விநாயகர் சிற்பத்தை உருவாக்கியுள்ளார்.
கற்பக விருட்சத்தின் அடியில் 13 மி.மீ. உயர விநாயகர் அமர்ந்திருப்பது போன்றும், விநாயகர் அருகே 2 மி.மீ. உயர மூஞ்சூறு இருப்பதும் போன்றும் இச்சிற்பம் நுண்ணிய, அதி அற்புதமான வேலைப்பாடுகளுடன் உருவாக்கப்பட்டுள்ளது. இச்சிற்பத்தை உருவாக்க 2 மாதங்கள் ஆனதாக தெரிவிக்கிறார் டி.கே.பரணி.