சென்னையில் வாக்காளர் பெயர் நீக்கல் பட்டியலில் 63 ஆயிரத்து 970 பேர் இடம்பெற்றுள்ளனர். அப்பட்டியல்கள் அனைத்து வாக்குச் சாவடிகளிலும் நேற்று பொதுமக்கள் பார்வைக்காக வைக்கப்பட்டன.
இது தொடர்பாக சென்னை மாநகராட்சி வெளியிட்ட செய்திக்குறிப்பில் கூறியிருப்பதாவது:
வாக்காளர் பட்டியல் செம்மைப்படுத்தும் பணியின் ஒரு பகுதி யாக சென்னை மாநகராட்சிக்கு உட்பட்ட 16 சட்டப்பேரவைத் தொகுதிகளிலும், வாக்காளர் பட்டியலில் இடம்பெற்றுள்ள வாக்காளர்களின் பதிவுகள் ஆய்வு செய்யப்பட்டன. அதில் இருமுறை இடம்பெற்ற பெயர்கள், இறந்தோர் பெயர்கள் அடங்கிய பட்டியல், வாக்குச் சாவடி வாரியாக தயார் செய்யப்பட்டுள்ளது.
கட்சி முகவர்களுக்கு நகல்கள்
இந்த பட்டியல்கள் மாநகராட்சிக்கு உட்பட்ட அனைத்து வாக்குச் சாவடிகளிலும் நேற்று பொதுமக்களின் பார்வைக்கு வைக்கப்பட்டன. அப்போது அரசியல் கட்சிகளைச் சேர்ந்த வாக்குச் சாவடி முகவர்களுக்கும் நகல்கள் வழங்கப்பட்டன. பட்டியலில் இடம்பெற்றுள்ள நீக்கப்பட இருப்போர் பெயர்கள் குறித்து ஆட்சேபணை இருப்பின், சம்பந் தப்பட்ட வாக்காளர் பதிவு அலுவலரிடம் முறையிடலாம். இந்த பட்டியலில் 63 ஆயி ரத்து 970 வாக்காளர்கள் இடம் பெற்றுள்ளனர். இந்த பட்டியல்கள், 4, 5, 6, 8, 9, 10, 13 ஆகிய மண்டல அலுவலகங்களில் அறிவிப்புப் பலகைகளில் இடம்பெற்றுள்ளன. மேலும் www.chennaicorporation.gov.in என்ற இணையதளத்தில் வெளியிடப்படும். இன்று, அப் பட்டியல் குடியிருப்போர் நலச் சங்கங்களில் வாசிக்கப்படுகிறது.
இவ்வாறு செய்திக் குறிப்பில் கூறப்பட்டுள்ளது.