சென்னை டாக்டர் ராதாகிருஷ்ணன் நகர் (ஆர்.கே.நகர்) சட்டப்பேரவை தொகுதி இடைத்தேர்தல் வரும் 27-ம் தேதி நடக்கிறது. இதற்கான வேட்புமனு தாக்கல் கடந்த 3-ம் தேதி தொடங்கியது. அதிமுக சார்பில் போட்டியிடும் முதல்வர் ஜெயலலிதா 5-ம் தேதி வேட்புமனுவை தாக்கல் செய்தார். மாற்று வேட்பாளராக அதிமுக அவைத் தலைவர் மதுசூதனன் மனுத் தாக்கல் செய்தார்.
முன்னதாக, மனுத் தாக்கல் தொடங்கிய அன்று டிராஃபிக் ராமசாமி, பத்மராஜன் உட்பட 5 பேரும், 5-ம் தேதி 10 பேரும், 6-ம் தேதி சசிபெருமாள் உட்பட 7 பேரும், 8-ம் தேதி 4 பேரும் மனுத் தாக்கல் செய்தனர். 4, 7-ம் தேதிகளில் யாரும் மனுத் தாக்கல் செய்யவில்லை.
இந்நிலையில், இந்திய மக்கள் கட்சி சார்பில் ஆர்.ஆபிரஹாம் ராஜாமோகன், கம்யூனிஸ்ட் கட்சிகள் சார்பில் சி.மகேந்திரன், மாற்று வேட்பாளராக எம்.எஸ்.மூர்த்தி, அகில பாரத இந்து மகா சபா சார்பில் என்.குமார், சுயேச்சை வேட்பாளர்களாக தருமபுரி பி.என்.ராமச்சந்திரன், வழக்கறிஞர் எம்.எல்.ரவி, கொடுங் கையூர் பி.பொன்ராஜ், பெரவள் ளூர் சி.மகாராஜன், வியாசர்பாடி எம்.கோபி, கொடுங்கையூர் வி.துரைவேல், திருவண்ணாமலை எம்.துரைராஜ் என 11 பேர் நேற்று மனுத்தாக்கல் செய்தனர்.
இதுவரை 2 வேட்பாளர்கள் 2 மனுக்களை தாக்கல் செய்துள்ள தால், 37 பேரிடம் இருந்து மொத்தம் 39 வேட்புமனுக்கள் பெறப்பட்டுள்ளன. வேட்புமனு தாக்கல் இன்றுடன் முடிகிறது. மனுக்கள் பரிசீலனை நாளை (11-ம் தேதி) நடக்கிறது. மனுக் களை வாபஸ் பெறுவதற்கான கடைசி நாள் 13-ம் தேதியாகும்.