சென்னை: பொங்கல் பண்டிகைக்காக சொந்த ஊர் சென்றவர்கள் சென்னை திரும்ப வசதியாக நாளை (ஜன.17) 3,507 சிறப்பு பேருந்துகள் இயக்கப்படவுள்ளதாக போக்குவரத்து துறை தெரிவித்துள்ளது.
பொங்கல் பண்டிகையை கொண்டாட சென்னையில் வசிக்கும் வெளிமாவட்ட மக்கள் சொந்த ஊர்களுக்குச் சென்றனர். பேருந்துகள், ரயில்கள், விமானம், சொந்த வாகனங்கள் மூலம் 18 லட்சத்துக்கும் அதிகமான மக்கள் சொந்த ஊர் சென்றனர். தமிழக அரசு போக்குவரத்து துறை சார்பில் கடந்த 9-ம் தேதி முதல் 14-ம் தேதி வரை 6 நாட்களில் 21,282 பேருந்துகள் இயக்கப்பட்டன. இவற்றில் 9.80 லட்சம் பேர் பயணம் செய்தனர்.
இதனிடையே, சொந்த ஊர் சென்ற மக்கள் சென்னை திரும்ப வசதியாக இன்று முதல் சிறப்பு பேருந்துகள் இயக்கப்படுகின்றன. பொங்கல் விடுமுறை ஞாயிற்றுக்கிழமை வரை இருக்கிறது, பெரும்பாலானார் ஞாயிற்றுக்கிழமை மதியத்துக்கு பின் ஊர் திரும்பவும், ஒரு சிலர் கூட்டத்தை தவிர்க்க சனிக்கிழமை காணும் பொங்கல் கொண்டாடங்களை முடித்து கொண்டு ஊர் திரும்பவும் திட்டமிட்டுள்ளனர்.
இன்று மாட்டுப்பொங்கல் என்பதால் குறைந்த அளவிலான பயணிகளே ஊர் திரும்ப திட்டமிட்டனர். இதன் காரணமாக இன்று பல்வேறு இடங்களிலிருந்து சென்னைக்கு வழக்கமாக இயக்கப்படும் 2,092 பேருந்துகளுடன் கூடுதலாக 775 பேருந்துகள் மட்டுமே இயக்கப்பட்டன. அரசு அலுவலக பணியாளர்கள், பள்ளி, கல்லூரி மாணவர்கள் சனிக்கிழமையும், ஞாயிற்றுக்கிழமையும் சென்னை திரும்ப திட்டமிட்டுள்ளனர்.
இதற்காக சனிக்கிழமை வழக்கமாக இயக்கப்படும் பேருந்துகளுடன் கூடுதலாக 1,415 பேருந்துகள் என மொத்தம் 3,507 பேருந்துகள் இயக்கப்பட உள்ளன. அதேபோல சென்னையைத் தவிர மற்ற நகரங்களுக்கு 2,060 பேருந்துகள் இயக்க திட்டமிடப்பட்டுள்ளது. ஞாயிற்றுக்கிழமை சென்னைக்கு கூடுதலாக 3,100 பேருந்துகளும், மற்ற நகரங்களுக்கு 4,080 பேருந்துகளும் இயக்க திட்டமிடப்பட்டுள்ளது.