பொன்முடியின் ‘டங்க் ஸ்லிப்’ பேச்சால் பேரவையில் சிரிப்பலை

‘முதல்வரைப் போல எனக்கும் டங்க் ஸ்லிப்’ ஆகிவிட்டது என பொன்முடி கூறிய பதிலால் சட்டப்பேரவையில் சிரிப்பலை எழுந்தது.

சட்டப்பேரவையில் ஆளுநர் உரைக்கு நன்றி தெரிவிக்கும் தீர்மானம் மீது நேற்று நடந்த விவாதம் வருமாறு:

பொன்முடி (திமுக):

ஆளுநர் உரையில் லோக் ஆயுக்தா பற்றி குறிப்பிடப்பட்டுள்ளது. லோக் பால் சட்டத்திருத்தத்துக்கு காத்திருக்காமல் லோக்ஆயுக்தாவை தமிழகத்தில் கொண்டுவர வேண்டும்.

முதல்வர் ஜெயலலிதா:

ஊழல் ஒழிப்பு விவகாரத்தில் திமுக அதீத அக்கறை கொண்டுள்ளது. திமுக ஆட்சியில் இருந்தபோது லோக் ஆயுக்தாவை கொண்டு வந்திருக்கலாமே?

பொன்முடி:

கடந்த 1973-ல் திமுக ஆட்சியின்போது, லோக் ஆயுக்தாவுக்கு இணையான ஊழல் ஒழிப்புச் சட்டம் கொண்டுவரப்பட்டது. அதை 1976-ல் அதிமுக அரசு ரத்து செய்துவிட்டது.

முதல்வர் ஜெயலலிதா:

இப்போது பேசுவது லோக் ஆயுக்தாவை பற்றிதான். திமுக எத்தனை முறை ஆட்சியில் இருந்தது. உங்கள் ஆட்சியில் ஏன் லோக் ஆயுக்தா சட்டம் கொண்டு வரவில்லை?

பொன்முடி:

நீங்கள்தான் கூறியுள்ளீர்கள். நாங்கள் சொல்லவில்லை

(அப்போது, முதல்வர் ஜெயலலிதாவிடம் நிதியமைச்சர் ஓ.பன்னீர்செல்வம் சில தகவல்களை கூறினார்.)

முதல்வர் ஜெயலலிதா:

1973-ல் திமுக கொண்டுவந்த சட்டத்தை 1976-ல் அதிமுக அரசு ரத்து செய்துவிட்டதாக பொன்முடி கூறியுள்ளார். ஆனால், 1977-ல்தான் எம்ஜிஆர் தலைமையிலான அதிமுக ஆட்சி தமிழகத்தில் அமைந்தது.

பொன்முடி:

ஆம், 1977-ல்தான் சட்டம் ரத்து செய்யப்பட்டது. ஏற்கெனவே முதல்வர் சட்டப்பேரவையில் ஒருமுறை தனக்கு ‘டங்க் ஸ்லிப்’ ஆனதாக தெரிவித்திருந்தார். அதேபோல எனக்கு இப்போது ‘டங்க் ஸ்லிப்’ ஆகிவிட்டது.

இவ்வாறு பொன்முடி கூறியதும் சட்டப்பேரவையில் பலத்த சிரிப்பலை எழுந்தது.