தமிழகத்தில் இன்று ஒருசில இடங்களில் மழை சென்னையில் தரைக் காற்று பலமாக வீசும்: வானிலை ஆய்வு மையம் தகவல்

வெப்ப சலனம் காரணமாக தமிழ்நாடு மற்றும் புதுச்சேரியில் ஒருசில இடங்களில் மழையோ அல்லது இடியுடன் கூடிய மழையோ பெய்யக்கூடும். சென்னை மற்றும் அதன் சுற்றுப் பகுதிகளில் தரைக் காற்று பலமாக வீசும். சில நேரங்களில் சூறைக் காற்று வீசவும் வாய்ப்பு உள்ளது என்று சென்னை வானிலை ஆய்வு மையம் தெரிவித்துள்ளது.

கடந்த 24 மணி நேரத்தில் கோவை மாவட்டம் சின்னக்கல்லாறு, வால்பாறை, நீலகிரி மாவட்டம் தேவாலாவில் தலா 30 மி.மீ, நீலகிரி மாவட்டம் நடுவட்டம், சேலத்தில் தலா 20 மி.மீ, கிருஷ்ணகிரி, கூடலூர் பஜார், வேலூர் மாவட்டம் ஆலங் காயத்தில் தலா 10 மி.மீட்டரும் மழை பதிவாகியுள்ளது.

அடுத்த 24 மணி நேரத்தில் வெப்ப சலனம் காரணமாக தமிழ்நாடு மற்றும் புதுச்சேரியில் ஒருசில இடங்களில் மழையோ அல்லது இடியுடன் கூடிய மழையோ பெய்யக்கூடும். சென்னை மற்றும் அதன் சுற்றுப்புறப் பகுதிகளில் முற்பகலில் வானம் ஓரளவு மேகமூட்டத்துடனும், அதன் பிறகு பொதுவான மேகமூட்டத்துடனும் காணப்படும். மாலை அல்லது இரவு நேரத்தில் சில பகுதிகளில் மழையோ அல்லது இடியுடன் கூடிய மழையோ பெய்யும். தரைக் காற்று பலமாக வீசும். சில நேரங்களில் சூறைக் காற்று வீசவும் வாய்ப்பு உள்ளது. அதிகபட்ச வெப்பநிலை 38 டிகிரி செல்சியஸாகவும், குறைந்தபட்ச வெப்பநிலை 29 டிகிரி செல்சியஸாகவும் இருக்கும் என்று சென்னை வானிலை ஆய்வு மையம் தெரிவித்துள்ளது.