தென்கிழக்கு வங்கக் கடலில் உருவாகியுள்ள புதிய காற்றழுத்த தாழ்வுப் பகுதியால் அடுத்து வரும் 3 தினங்களில் வடகடலோர மாவட்டங்களில் கனமழை பெய்யும் என வானிலை ஆய்வு மையம் தெரிவித்துள்ளது.
இதுகுறித்து வானிலை ஆய்வு மைய இயக்குனர் பாலச்சந்திரன் சென்னையில் இன்று செய்தியாளர்களிடம் கூறியதாவது:
''தென் கிழக்கு வங்கக் கடல் பகுதியில் குறைந்த காற்றழுத்த தாழ்வுப் பகுதி உருவாகியுள்ளது. இது அடுத்து வரும் 24 மணி நேரங்களில் சற்று வலுப்பெற்று மேற்கு திசை நோக்கி நகரும். வரும் 20-ம் தேதி இந்த குறைந்த காற்றழுத்த தாழ்வுப் பகுதி தமிழகம் மற்றும் புதுவை கரையை ஒட்டி நிலைகொள்ளத் தொடங்கும். இதன்காரணமாக வரும் 19-ம் தேதி கடலோர மாவட்டங்களில் மழை பெய்யத் தொடங்கும். பின்னர் 20, 21 தேதிகளில் படிப்படியாக உள் மாவட்டங்களில் மழை பெய்யும்.
கனமழையைப் பொறுத்தவரை 19-ம் தேதி வடகடலோர மாவட்டங்களில் ஓரிரு இடங்களில் கனமழை முதல் மிக கனமழை பெய்யக்கூடும். தென் தமிழக கடலோர மாவட்டங்களில் ஓரிரு இடங்களில் கனமழை பெய்யக்கூடும்.
20-ம் தேதி தமிழகம் மற்றும் புதுவையில் பரவலாக மழைப்பெய்யக்கூடும். உள் மாவட்டங்களில் ஒரு சில இடங்களில் கனமழை முதல் மிக கனமழை பெய்யக்கூடும். தென் தமிழகத்தில் ஓரிரு இடங்களில் கனமழை பெய்யக்கூடும்.
மீனவர்கள் 18-ம் தேதி தென் கிழக்கு வங்கக்கடல், 19-ம் தேதி தென்மேற்கு வங்கக் கடல் பகுதிக்கும், 20-ம் தேதி தென்மேற்கு வங்கக் கடல் மற்றும் மன்னார் வளைகுடா பகுதிகளுக்கும் செல்லக்கூடாது என்று அறிவுறுத்தப்படுகிறது.
சென்னையைப் பொறுத்தவரை அடுத்து வரும் 24 மணி நேரத்தில் ஓரிரு இடங்களில் லேசாக மழை பெய்யக்கூடும். பின்னர் 19-20 தேதிகளில் மிதமான மழைப் பெய்யக்கூடும்''.
இவ்வாறு பாலச்சந்திரன் தெரிவித்தார்.
சென்னைக்கு கனமழைக்கு வாய்ப்புள்ளதா?புயலாக வர வாய்ப்புண்டா?என்று செய்தியாளர்கள் கேள்வி எழுப்பினர். அதற்குப் பதிலளித்த பாலச்சந்திரன், ''தற்போதைய நிலையில் மிதமான மழைக்கு மட்டுமே வாய்ப்பு. புயலாக வர வாய்ப்பில்லை'' என்றார்.