சென்னை: கும்பகோணத்தில் கலைஞர் பல்கலைக்கழகம் அமைப்பதற்கான சட்ட மசோதாவை குடியரசுத் தலைவருக்கு ஆளுநர் ஆர்.என்.ரவி அனுப்பி வைத்துள்ளார். தமிழக சட்டப்பேரவையில் கடந்த மார்ச், ஏப்ரல் மாதங்களில் பட்ஜெட் கூட்டத் தொடர் நடைபெற்றது.
இக்கூட்டத் தொடரில், கும்பகோணத்தில் மறைந்த முன்னாள் முதல்வர் மு.கருணாநிதி பெயரில் கலைஞர் பல்கலைக்கழகத்தை உருவாக்குவதற்கான சட்டமசோதா தாக்கல் செய்யப்பட்டு நிறைவேற்றப்பட்டது.
அதன்பின் மசோதா ஆளுநர் ஒப்புதலுக்கு அனுப்பி வைக்கப்பட்டது. இந்த மசோதாவுக்கு ஆளுநர் ஒப்புதல் அளிக்காமல் நிலுவையில் இருந்தது. இந்த சூழலில் மசோதாவை குடியரசுத் தலைவர் ஒப்புதலுக்கு ஆளுநர் ஆர்.என்.ரவி அனுப்பியுள்ளதாக தகவல் வெளியாகியுள்ளது.
பல்கலைக்கழக மானியக் குழு (யுஜிசி) விதிகள் மற்றும் துணைவேந்தர் நியமன மசோதா உள்ளிட்டவை தொடர்பாக பல்வேறு வழக்குகள் நீதிமன்றத்தில் நிலுவையில் உள்ள நிலையில், மசோதா குடியரசுத் தலைவருக்கு அனுப்பி வைக்கப்பட்டுள்ளதாக கூறப்படுகிறது.