கோவை: பாலியல் வன்கொடுமை குற்றங்களை திமுக அரசு மறைக்க முயற்சிக்கிறது என, பாஜக தேசிய மகளிரணி தலைவர், கோவை தெற்கு எம்எல்ஏ வானதி சீனிவாசன் தெரிவித்துள்ளார்.
இதுகுறித்து அவர் வெளியிட்டுள்ள அறிக்கையில் கூறியிருப்பதாவது: அரக்கோணம் கல்லூரி மாணவி பாலியல் வன்கொடுமை வழக்கில் தேசிய மகளிர் ஆணையத்தின் விசாரணைக்கு தமிழ்நாடு காவல்துறை முழு ஒத்துழைப்பு அளிக்க வேண்டும்.
திமுக ஆட்சியில் பெண்களுக்கு எதிரான பாலியல் சீண்டல்கள், பாலியல் வன்கொடுமை சம்பவங்கள் அதிகரித்து வருகின்றன. தமிழ்நாட்டின் அடையாளமான சென்னை அண்ணா பல்கலைக்கழக மாணவி, பல்கலை வளாகத்திலேயே ஆட்சியாளர்களுக்கு நெருக்கமானவர்களால் பாலியல் வன்கொடுமைக்கு ஆளாக்கப்பட்டார்.
இச்சம்பவத்தில் கைதான ஞானசேகரன் திமுக நிர்வாகி அல்ல. திமுக அனுதாபி என சட்டப்பேரவையில் கூற வேண்டிய நிலைக்கு முதலமைச்சர் ஸ்டாலின் தள்ளப்பட்டார். பாதிக்கப்பட்ட மாணவிக்கு தற்போது வரை நீதி கிடைக்கவில்லை.
ராணிப்பேட்டை மாவட்டம் அரக்கோணம் திமுக இளைஞரணி துணை அமைப்பாளர் தெய்வசெயல் மீது, கல்லூரி மாணவி ஒருவர் அளித்துள்ள புகார் அதிர்ச்சி அளிக்கிறது. தன்னை பாலியல் வன்கொடுமைக்கு ஆளாக்கியதுடன், திமுக முக்கியப் பிரமுகர்களுக்கு இரையாக்க முயன்றதாக கூறியதுடன், ஒரு அமைச்சர், அவரது உதவியாளர் பெயரையும் குறிப்பிட்டிருப்பதாக வரும் செய்திகள் பெரும் அதிர்ச்சி அளிக்கிறது.
மாணவியின் புகார் ஊடகங்களில் வெளியாகி, அரசியல் கட்சித் தலைவர்களும் பலரும் கண்டனம் தெரிவித்த பிறகே காவல்துறை வழக்குப் பதிந்துள்ளது. பெண்களுக்கு எதிரான குற்றங்கள் நடந்தாலும், அதை மறைக்கவே திமுக அரசு முயற்சிக்கிறது. தகவல் வெளியாகி வேறு வழியில்லாத நிலை ஏற்படும்போது மட்டுமே வழக்குப்பதிவு செய்யப்படுகிறது.
அரக்கோணம் கல்லூரி மாணவி கூறிய புகார்கள் குறித்து காவல்துறை தீர விசாரித்து, இதில் சம்பந்தப்பட்ட குற்றவாளிகள் யாராக இருந்தாலும் நடவடிக்கை எடுக்க வேண்டும். இந்த வழக்கை தேசிய மகளிர் ஆணையம் தாமாக முன்வந்து விசாரணைக்கு ஏற்றுள்ளது வரவேற்கத்தக்கது. தேசிய மகளிர் ஆணையத்தின் விசாரணைக்கு தமிழ்நாடு காவல்துறை முழு ஒத்துழைப்பு அளிக்க வேண்டும்.இவ்வாறு அந்த அறிக்கையில் தெரிவிக்கப்பட்டுள்ளது.