கோப்புப் படம்
பொன்னேரி: மழை காரணமாக ஆங்காங்கே முளைத்திருந்த காளான்களை சமைத்து சாப்பிட்ட வடமாநில தொழிலாளர்கள் 12 பேருக்கு வாந்தி, மயக்கம் ஏற்பட்டது.
திருவள்ளூர் மாவட்டத்தில் பல்வேறு பகுதிகளில் தற்போது நெல் நடவுப் பணிகள் தீவிரமாக நடைபெற்று வருகின்றன.
பொன்னேரி, மீஞ்சூர் மற்றும் அதைச் சுற்றியுள்ள கிராமங்களில் ஆந்திரா மற்றும் வடமாநிலங்களைச் சேர்ந்த விவசாய கூலித் தொழிலாளர்கள் ஏராளமானோர் தங்கி, நடவுப் பணிகளில் ஈடுபட்டு வருகின்றனர்.
அந்த வகையில், பொன்னேரி அருகே உள்ள பெரிய கரும்பூர் கிராமத்தில் தங்கியுள்ள மேற்குவங்க மாநிலத்தைச் சேர்ந்த விவசாய கூலித் தொழிலாளர்கள் கடந்த 21-ம் தேதி அப்பகுதியில் உள்ள விவசாயி ஒருவரது நிலத்தில் நாற்று நடவு செய்யும் பணியில் ஈடுபட்டனர்.
அவர்கள் பணி முடிந்து தங்குமிடம் திரும்பும்போது, மழையின் காரணமாக வயல்வெளியில் ஆங்காங்கே முளைத்திருந்த காளான்களை பறித்துச் சென்று, சமைத்து சாப்பிட்டுள்ளனர்.
காளான் உணவு சாப்பிட்ட 6 பெண்கள் உட்பட 12 பேருக்கு சிறிது நேரத்தில் வாந்தி, மயக்கம் ஏற்பட்டது. அதிர்ச்சியடைந்த சக தொழிலாளர்கள் கிராம மக்களின் உதவியுடன் பாதிக்கப்பட்டவர்களை மீட்டு பொன்னேரி அரசு மருத்துவமனைக்கு அனுப்பி வைத்தனர்.
அங்கு அவர்கள் அனுமதிக்கப்பட்டு சிகிச்சை அளிக்கப்பட்டு, நேற்று முன்தினம் இரவு தங்குமிடம் திரும்பினர். இதுகுறித்து, கும்மிடிப்பூண்டி போலீஸார் விசாரித்து வருகின்றனர்.