சென்னை: தமிழகத்தில் இன்று முதல் 6 நாட்களுக்கு ஓரிரு இடங்களில் மழை பெய்ய வாய்ப்புள்ளதாக வானிலை ஆய்வு மையம் தெரிவித்துள்ளது.
இது தொடர்பாக சென்னை வானிலை ஆய்வு மைய இயக்குநர் பா.செந்தாமரைக்கண்ணன் வெளியிட்ட செய்திக்குறிப்பு: தமிழகம் நோக்கி வீசும் மேற்குதிசைக் காற்றில் வேக மாறுபாடு நிலவுவதால் தமிழ்நாடு, புதுச்சேரி மாநிலங்களில் இன்று முதல் வரும் 8-ம் தேதி வரை ஓரிரு இடங்களிலும், வரும் 9, 10-ம் தேதிகளில் சில இடங்களிலும் லேசானதுமுதல் மிதமான மழை பெய்யக்கூடும்.
அதேபோல, தமிழ்நாடு, புதுச்சேரி மாநிலங்களில் இன்று (ஆக. 5) சில இடங்களில் அதிகபட்ச வெப்பநிலை 100 டிகிரி முதல் 104டிகிரி ஃபாரன்ஹீட் அளவில் இருக்கக்கூடும். சில இடங்களில் வழக்கத்தைவிட 4 டிகிரி ஃபாரன்ஹீட் வரை அதிகரிக்கும்.
சென்னை மற்றும் புறநகர்ப் பகுதிகளில் அடுத்த 48 மணி நேரத்தில் வானம் ஓரளவு மேகமூட்டத்துடன் காணப்படும். நகரின் சில பகுதிகளில் லேசான அல்லது மிதமான மழை பெய்யக்கூடும்.