மவுண்ட் மவுங்கனி: நியூஸிலாந்து அணிக்கு எதிரான கடைசி மற்றும் 3-வது டெஸ்ட் கிரிக்கெட் போட்டியின் 3-வது நாள் ஆட்டத்தில் மேற்கு இந்தியத் தீவுகள் அணி 6 விக்கெட்கள் இழப்புக்கு 381 ரன்கள் குவித்தது. கவேம் ஹாட்ஜ் சதம் விளாசினார்.
மவுண்ட் மவுங்கனியில் உள்ள பே ஓவல் மைதானத்தில் நடைபெற்று வரும் இந்த டெஸ்ட் போட்டியில் நியூஸிலாந்து அணி முதல் இன்னிங்ஸில் 155 ஓவர்களில் 8 விக்கெட்கள் இழப்புக்கு 575 ரன்கள் குவித்து டிக்ளேர் செய்தது. அதிகபட்சமாக டேவன் கான்வே 227, டாம் லேதம் 137 ரன்கள் விளாசினர்.
இதையடுத்து பேட் செய்த மேற்கு இந்தியத் தீவுகள் அணி 2-வது நாள் ஆட்டத்தின் முடிவில் 23 ஓவர்களில் விக்கெட் இழப்பின்றி 110 ரன்கள் எடுத்தது. பிரண்டன் கிங் 55 ரன்களும், ஜாண் கேம்பல் 45 ரன்களும் சேர்த்து ஆட்டமிழக்காமல் இருந்தனர். நேற்று 3-வது நாள் ஆட்டத்தை மேற்கு இந்தியத் தீவுகள் அணி தொடர்ந்து விளையாடியது.
பிரண்டன் கிங் 104 பந்துகளில், 10 பவுண்டரிகளுடன் 63 ரன்கள் எடுத்த நிலையில் ஜேக்கப் டஃபி பந்தில் போல்டானார். ஜாண் கேம்பல் 45 ரன்களில் வெளியேறினார். இதையடுத்து களமிறங்கிய டெவின் இம்லாக் 27, அலிக் அதானஸ் 45, ஜஸ்டின் கிரீவ்ஸ் 43, கேப்டன் ராஸ்டன் சேஸ் 2 ரன்களில் ஆட்டமிழந்தார்.
சீரான இடைவேளையில் விக்கெட்கள் சரிந்த போதிலும் கவேம் ஹாட்ஜ் நிதானமாக விளையாடி 224 பந்துகளில், 13 பவுண்டரிகளுடன் சதம் விளாசினார். இது அவரது 2-வது சதமாக அமைந்தது. 3-வது நாள் ஆட்டத்தின் முடிவில் மேற்கு இந்தியத் தீவுகள் அணி 113 ஓவர்களில் 6 விக்கெட்கள் இழப்புக்கு 381 ரன்கள் எடுத்தது.
கவேம் ஹாட்ஜ் 109, ஆண்டர்சன் பிலிப் 12 ரன்களுடன் ஆட்டமிழக்காமல் இருந்தனர். நியூஸிலாந்து அணி தரப்பில் ஜேக்கப் டஃபி, அஜாஸ் படேல் ஆகியோர் தலா 2 விக்கெட்களை வீழ்த்தினர். மைக்கேல் ரே, டேரில் மிட்செல் ஆகியோர் தலா ஒரு விக்கெட் கைப்பற்றினர். 194 ரன்கள் பின்தங்கிய உள்ள மேற்கு இந்தியத் தீவுகள் அணி கைவசம் 4 விக்கெட்கள் உள்ள நிலையில் இன்று 4-வது நாள் ஆட்டத்தை சந்தித்தது.
முதல் இன்னிங்ஸில் மேற்கொண்டு 39 ரன்கள் மட்டும் சேர்க்க அனுமதித்தனர் நியூஸிலாந்து அணி பவுலர்கள். ஆண்டர்சன் பிலிப், ஷாய் ஹோப், ஜேடன் சீல்ஸ், ரோச் ஆகியோர் அடுத்தடுத்து ஆட்டமிழந்தனர். 420 ரன்களுக்கு மேற்கு இந்தியத் தீவுகள் அணி ஆல் அவுட் ஆனது.
155 ரன்கள் முன்னிலையுடன் இரண்டாவது இன்னிங்ஸை நியூஸிலாந்து அணி தொடங்கியது. அந்த அணி இரண்டாவது இன்னிங்ஸில் 2 விக்கெட் இழப்புக்கு 306 ரன்கள் எடுத்தது. கான்வே மற்றும் லேதம் சதம் விளாசினர். வில்லியம்சன் 40 மற்றும் ரச்சின் ரவீந்திரா 46 ரன்கள் எடுத்த நிலையில் இன்னிங்ஸை டிக்ளேர் செய்தார் நியூஸிலாந்து கேப்டன் லேதம்.
இதையடுத்து 462 ரன்கள் இலக்கை மேற்கு இந்தியத் தீவுகள் அணி விரட்டி வருகிறது. 4-ம் நாள் ஆட்ட முடிவில் 16 ஓவர்களில் விக்கெட் இழப்பின்றி 43 ரன்கள் எடுத்தது. கடைசி நாளான நாளைய தினம் 419 ரன்கள் எடுத்தால் அந்த அணி வெற்றி பெறும்.
கான்வே சாதனை: டெஸ்ட் கிரிக்கெட் வரலாற்றில் ஒரே போட்டியில் இரட்டை சதம் மற்றும் சதம் விளாசிய பேட்ஸ்மேன்கள் பட்டியலில் 10-வது வீரராக கான்வே இணைந்துள்ளார். அதே போல ஒரே டெஸ்ட் போட்டியில் அதிக ரன்கள் எடுத்த நியூஸிலாந்து வீரர்களின் பட்டியலில் 327 ரன்கள் உடன் அவர் மூன்றாம் இடத்தில் உள்ளார். இந்த போட்டியின் முதல் இன்னிங்ஸில் 227, இரண்டாவது இன்னிங்ஸில் 100 ரன்களை கான்வே பதிவு செய்தார். முதல் இடத்தில் பிளெமிங் 343 ரன்களும், இரண்டாம் இடத்தில் மார்ட்டின் குரோவ் 329 ரன்கள் உடன் உள்ளனர்.