டைமண்ட் லீக் இறுதிப் போட்டிக்கு நீரஜ் சோப்ரா தகுதி

புதுடெல்லி: இந்திய ஈட்டி எறிதல் நட்சத்திர வீரர் நீரஜ் சோப்ரா டைமண்ட் லீக் இறுதிக் போட்டிக்கு தகுதி பெற்றுள்ளார்.

நடப்பு ஆண்டில் 14 டைமண்ட் லீக் தடகள போட்டிகள் நடைபெற்றன. இதில் 5-ல் மட்டுமே ஆடவருக்கான ஈட்டி எறிதல் போட்டி இடம் பெற்றிருந்தது. அதில் இந்திய ஈட்டி எறிதல் நட்சத்திரமான நீரஜ் சோப்ரா 2 போட்டிகளில் மட்டுமே பங்கேற்றார்.

கடந்த ஜூன் 19-ல் தோஹாவில் நடைபெற்ற போட்டியிலும், ஆகஸ்ட் 21-ல் நடைபெற்ற லாசான் போட்டியிலும் பங்கேற்ற நீரஜ் சோப்ரா 2-வது இடம் பிடித்திருந்தார். இதன் மூலம் 12 புள்ளிகளைப் பெற்ற அவர், ஒட்டுமொத்த தரவரிசையில் 6-வது இடத்தைப் பிடித்து இறுதிப் போட்டிக்கு தகுதி பெற்றுள்ளார்.

நேற்று முன்தினம் சுவிட்சர்லாந்தின் ஜூரிச் நகரில் 14-வது மற்றும் கடைசி டைமண்ட் லீக் போட்டி நடைபெற்றது. இதன் பின்னர் வெளியிடப்பட்ட தரவரிசையின் வாயிலாக நீரஜ் சோப்ரா இறுதிப் போட்டியில் கால்பதித்துள்ளார். இறுதிப் போட்டி வரும் செப்டம்பர் 5-ம் தேதி பெல்ஜியம் நாட்டின் பிரஸ்ஸல்ஸ் நகரில் நடைபெற உள்ளது.

கடந்த ஆண்டு செப்டம்பர் மாதம் முதல் நீரஜ் சோப்ராவை கீழ் முதுகுப் பகுதி காயம் அச்சுறுத்தி வந்தது. இதனால் அவர், களத்துக்கு திரும்புவதில் தாமதம் ஏற்பட்ட நிலையில், தோஹா டைமண்ட் லீக் தொடரின் மூலமே அவர் மீண்டும் திரும்பினார்.

சமீபத்தில் நடைபெற்ற கிளாஸ்கோ காமன்வெல்த் போட்டியில் முழு உடல்தகுதியுடன் இல்லாத நிலையிலும், 85.83 மீட்டர் தூரம் எறிந்து வெள்ளிப் பதக்கம் வென்றிருந்தார் நீரஜ் சோப்ரா. அதைத் தொடர்ந்து லாசான் தொடரில் தனது எறிதல் தூரத்தை 88.05 மீட்டராக உயர்த்தி இருந்தார்.

இலங்கையின் இளம் நட்சத்திர வீரர் ருமேஷ் பதிரகே 39 புள்ளிகளுடன் தரவரிசையில் முதலிடத்தைப் பிடித்து டைமண்ட் லீக் கோப்பையை வெல்லும் முன்னணி போட்டியாளராகத் திகழ்கிறார். இந்த சீசனின் 5 டைமண்ட் லீக் போட்டிகளிலுமே பங்கேற்ற அவர், 4-ல் வெற்றியும் ஒன்றில் 2-ம் இடமும் பிடித்து தனது ஆதிக்கத்தை நிலைநாட்டியுள்ளார்.

நேற்று முன்தினம் ஜூரிச்சில் நடைபெற்ற போட்டியில் அவர் 92.07 மீட்டர் தூரம் எறிந்து முதலிடம் பிடித்தார். இந்த சீசனில் அவர் 90 மீட்டரைக் கடப்பது இது இரண்டாவது முறையாகும். ரோமில் நடைபெற்ற போட்டியில் அவர், 92.62 மீட்டர் தூரம் ஈட்டியை எறிந்திருந்தார்.

ஜெர்மனியின் ஜூலியன் வெபர் இந்த சீசனில் 90.40 மீட்டர் எறிந்த போதிலும், காயத்தால் டைமண்ட் லீக் போட்டிகளில் பங்கேற்காததால் இறுதிப்போட்டிக்குத் தகுதி பெறவில்லை.

இருமுறை உலக சாம்பியனான கிரெனடாவின் ஆண்டர்சன் பீட்டர்ஸ் 35 புள்ளிகளுடன் 2-வது இடத்தையும், உலக சாம்பியனான ட்ரினிடாட் & டொபாகோவின் கேஷார்ன் வால்காட் 23 புள்ளிகளுடன் 3-வது இடத்தையும், அமெரிக்காவின் கர்டிஸ் தாம்சன் (20 புள்ளிகள்), கென்யாவின் ஜூலியஸ் யேகோ (13 புள்ளிகள்) முறையே 4 மற்றும் 5-வது இடங்களைப் பிடித்து இறுதிப்போட்டிக்குத் தகுதி பெற்றுள்ளனர்.

நீரஜ் சோப்ரா, உலக தடகள அல்டிமேட் சாம்பியன்ஷிப் போட்டிக்கும் தகுதி பெற்றுள்ளார். இந்த போட்டி வரும் செப்டம்பர் 11 முதல் 13 வரை ஹங்கேரியின் புடாபெஸ்ட் நகரில் நடைபெறுகிறது. இந்தத் தொடரில் ஆடவர் ஈட்டி எறிதலில் 8 வீரர்கள் பங்கேற்கின்றனர். இதில் நீரஜ் சோப்ரா 7-வது வீரராக தகுதி பெற்றுள்ளார்.