ஃபோர்ட் லாடர்டேல்: அர்ஜெண்டினா கால்பந்து அணியைச் சேர்ந்த பிரபல நட்சத்திர வீரர் லயோனல் மெஸ்ஸி 48-வது பட்டத்தை வென்று அசத்தல் சாதனை புரிந்துள்ளார். இன்டர் மியாமி அணிக்காக விளையாடி வரும் அவர், முதல்முறையாக எம்எல்எஸ் கோப்பையை வென்று கொடுத்துள்ளார்.
38 வயதாகும் அர்ஜெண்டினா கால்பந்து அணி வீரரான லயோனல் மெஸ்ஸி, பார்சிலோனா எஃப்சி அணிக்காக அதிக போட்டிகளில் விளையாடியுள்ளார். அதன் பின்னர் அவர் சில காலம் பிஎஸ்ஜி அணிக்காக களமிறங்கினார். இதைத் தொடர்ந்து பிஎஸ்ஜி அணியில் இருந்து இன்டர் மியாமி அணிக்கு கடந்த 2023-ம் ஆண்டுக்குத் தாவினார்.
அப்போது முதல் அவர் இன்டர் மியாமி அணிக்காக விளையாடி வருகிறார். இந்நிலையில் நேற்று முன்தினம் இரவு அமெரிக்காவின் புளோரிடா மாகாணாத்திலுள்ள ஃபோர்ட் லாடர்டேல் நகரில் எம்எல்எஸ் கோப்பை கால்பந்து இறுதிப் போட்டி நடைபெற்றது.
வான்கூவரை வீழ்த்தியது: இறுதிப் போட்டியில் இன்டர்மியாமி அணியும், வான்கூவர் அணியும் மோதின. இதில் இன்டர் மியாமி அணி 3-1 என்ற கோல் கணக்கில் வான் கூவர் அணியை வீழ்த்தியது.
இந்தப் போட்டியில் மெஸ்ஸி கோல் அடிக்காவிட்டாலும், 2 கோல்களை சக அணி வீரர்கள் அடிப்பதற்காக உதவி புரிந்திருந்தார். இதன் மூலம் 48-வது கோப்பையை தனது கால்பந்து வரலாற்றில் தான் சார்ந்த அணிக்காக பெற்றுக் கொடுத்து சாதனை புரிந்துள்ளார் மெஸ்ஸி.