அயர்லாந்து கேப்டன் லோர்கன் டக்கர்
கொழும்பு: ஐசிசி டி20 உலகக் கோப்பை கிரிக்கெட் தொடரில் ‘பி’ பிரிவில் நேற்று கொழும்பு நகரில் உள்ள எஸ்எஸ்சி மைதானத்தில் நடைபெற்ற லீக் ஆட்டத்தில் அயர்லாந்து - ஓமன் அணிகள் மோதின.
முதலில் பேட் செய்த அயர்லாந்து அணி ஒரு கட்டத்தில் 7.3 ஓவர்களில் 64 ரன்களுக்கு 4 விக்கெட்களை இழந்து தடுமாறியது. டிம் டெக்டர் 5, ரோஸ் அடேர் 14, ஹாரி டெக்டர் 14, கர்திஷ் கேம்பர் 12 ரன்களில் நடையை கட்டினர். இதன் பின்னர் 5-வது விக்கெட்டுக்கு இணைந்த கேப்டன் லோர்கன் டக்கர், கரேத் டெலானி ஜோடி ஓமன் அணியின் பந்துவீச்சை வெளுத்து வாங்கியது. கரேத் டெலானி 30 பந்துகளில், 4 சிக்ஸர்கள், 3 பவுண்டரிகளுடன் 56 ரன்கள் விளாசி ஆட்டமிழந்தார். 5-வது விக்கெட்டுக்கு லோர்கன் டக்கர், கரேத் டெலானி ஜோடி 56 பந்துகளில் 101 ரன்கள் குவித்தது. இதைத் தொடர்ந்து களமிறங்கிய ஜார்ஜ் டாக்ரெல்லும் மட்டையை சுழற்றினார்.
லோர்கன் டக்கர் 51 பந்துகளில், 4 சிக்ஸர்கள், 10 பவுண்டரிகளுடன் 94 ரன்களும், ஜார்ஜ் டாக்ரெல் 9 பந்துகளில், 5 சிக்ஸர்களுடன் 35 ரன்களும் விளாச அயர்லாந்து அணி 20 ஒவர்களின் முடிவில் 5 விக்கெட்கள் இழப்புக்கு 235 ரன்கள் குவித்தது.
லோர்கன் டக்கர், ஜார்ஜ் டாக்ரெல் ஜோடி 19 பந்து களில் 70 ரன்களை குவித்து மிரட்டியது. கடைசி 4 ஓவர்களில் மட்டும் அயர்லாந்து அணி 86 ரன்களை வேட்டையாடியது. முன்னதாக லோர்கன் டக்டர் 18 ரன்களில் இருந்த போது ஸ்டெம்பிங் முறையில் ஆட்டமிழப்பதில் இருந்து தப்பித்தார். ஓமன் அணி தரப்பில் இடதுகை சுழற்பந்துவீச்சாளரான ஷகீல் அகமது 3 விக்கெட்களை கைப்பற்றினார்.
237 ரன்கள் இலக்குடன் பேட் செய்த ஓமன் அணி 24 ரன்களுக்கு 2 விக்கெட்களை இழந்தது. கேப்டன் ஜதிந்தர் சிங் 7, ஆஷிஸ் ஓடேரா 1 ரன்னில் ஆட்டமிழந்தனர். இதைத் தொடர்ந்து களமிறங்கிய ஹமது மிர்சா, அமிர் கலீமுடன் இணைந்து மட்டையை சுழற்றினார். இதனால் 10 ஓவர்களில் ஓமன் அணி 93 ரன்களை குவித்தது. சிறப்பாக பேட் செய்து வந்த அமிர் கலீம் 29 பந்துகளில், 2 சிக்ஸர்கள், 5 பவுண்டரிகளுடன் 50 ரன்கள் எடுத்த நிலையில் மெக்கார்த்தி பந்தில் ஆட்டமிழந்தார்.
இதைத் தொடர்ந்து விநாயக் சுக்லா 0, முகமது நதீம் 1 ரன்களில் நடையை கட்டினர். ஹமது மிர்சா 37 பந்துகளில், ஒரு சிக்ஸர், 6 பவுண்டரிகளுடன் 46 ரன்கள் எடுத்த நிலையில் ரன் அவுட் ஆனார். இதன் பின்னர் ஓமன் அணி மளமளவென விக்கெட்களை பறிகொடுத்து 18 ஓவர்களில் 139 ரன்களுக்கு ஆட்டமிழந்தது. அந்த அணி தனது கடைசி 8 விக்கெட்களை 42 ரன்களுக்கு தாரை வார்த்தது. ஒட்டுமொத்தமாக அந்த அணியின் 8 பேட்ஸ்மேன்கள் ஒற்றை இலக்க ரன்னில் நடையை கட்டினர்.
அயர்லாந்து அணி தரப்பில் ஜோஷ் லிட்டில் 4 ஓவர்களை வீசி 16 ரன்களை வழங்கி 3 விக்கெட்களை வீழ்த்தினார். மேத்யூ ஹம்ப்ரேஷ், பார்ரி மெக்கார்த்தி ஆகியோர் தலா 2 விக்கெட்களை கைப்பற்றினர். 96 ரன்கள் வித்தியாசத்தில் வெற்றி பெற்ற அயர்லாந்து அணிக்கு இது முதல் வெற்றியாக அமைந்தது.
3 ஆட்டங்களில் விளையாடி உள்ள அந்த அணி 2 தோல்வி, ஒரு வெற்றியுடன் 2 புள்ளிகள் பெற்று தனது பிரிவில் 4-வது இடத்தி உள்ளது. ஓமன் அணிக்கு இது ஹாட்ரிக் தோல்வியாக அமைந்தது. இதன் மூலம் அந்த அணி சூப்பர் 8 சுற்றுக்கு முன்னேறும் வாய்ப்பை இழந்து முதல் அணியாக தொடரில் இருந்து வெளியேறுவதை உறுதி செய்தது.
2-வது அதிகபட்ச ஸ்கோர்: டி20 உலகக் கோப்பை தொடரில் நேற்று ஓமனுக்கு எதிரான ஆட்டத்தில் அயர்லாந்து அணி 5 விக்கெட்கள் இழப்புக்கு 235 ரன்கள் குவித்தது. இது டி20 உலகக் கோப்பை வரலாற்றில் 2-வது அதிகபட்ச ஸ்கோராக அமைந்தது. இந்த வகை சாதனையில் 2007-ம் ஆண்டு உலகக் கோப்பை தொடரில் கென்யாவுக்கு எதிராக இலங்கை அணி 260 ரன்கள் குவித்தது முதலிடத்தில் உள்ளது.
டி20-ல் அதிகம்: டி20 உலகக் கோப்பை தொடரில் நேற்று ஓமனுக்கு எதிரான ஆட்டத்தில் அயர்லாந்து அணி 5 விக்கெட்கள் இழப்புக்கு 235 ரன்கள் குவித்தது. சர்வதேச டி20 அரங்கில் அந்த அணியின் அதிகபட்ச ரன்குவிப்பாக இது அமைந்தது. இதற்கு முன்னர் அந்த அணி 2023-ம் ஆண்டு ஆஸ்திரியாவுக்கு எதிராக 226 ரன்கள் குவித்திருந்தது.
டாப்பில் லோர்கன் டக்கர்: டி20 உலகக் கோப்பை தொடரில் நேற்று ஓமன் அணிக்கு எதிரான ஆட்டத்தில் அயர்லாந்து அணியின் கேப்டன் லோர்கன் டக்கர் 96* ரன்கள் விளாசினார். இதன் மூலம் டி20 உலகக் கோப்பையில் அயர்லாந்து அணிக்காக அதிக ரன்கள் விளாசிய வீரர் என்ற பெருமையை லோர்கன் டக்கர் பெற்றார். இந்த வகையில் இதற்கு முன்னர் கர்திஷ் கேம்பர் 2022-ம் ஆண்டு உலகக் கோப்பை தொடரில் ஸ்காட்லாந்துக்கு எதிராக 72* ரன்கள் சேர்த்ததே அதிகபட்சமாக இருந்தது.
கேப்டனாக 2-வது இடம்: டி20 உலகக் கோப்பை தொடரில் நேற்று ஓமன் அணிக்கு எதிரான ஆட்டத்தில் அயர்லாந்து அணியின் கேப்டன் லோர்கன் டக்கர் 96* ரன்கள் விளாசினார். இதன் மூலம் டி 20 உலகக் கோப்பை வரலாற்றில் கேப்டனாக அதிக ரன்கள் விளாசிய வீரர்களின் பட்டியலில் லோர்கன் டக்கர் 2-வது இடட்ம பிடித்தார். இந்த வகை சாதனையில் கிறிஸ் கெய்ல் 98 ரன்களுடன் முதலிடத்தில் உள்ளார்.