பெங்களூரு: ஐபிஎல் 2026 தொடரின் 11-வது லீக் ஆட்டத்தில், ராயல் சேலஞ்சர்ஸ் பெங்களூரு அணி, சென்னை சூப்பர் கிங்ஸ் அணியை 43 ரன்கள் வித்தியாசத்தில் வீழ்த்தி வெற்றியைப் பதிவு செய்தது.
பெங்களூரு சின்னசாமி மைதானத்தில் நடைபெற்ற இந்தப் போட்டியில், முதலில் பேட்டிங் செய்த ஆர்சிபி அணி, ஐபிஎல் வரலாற்றில் சென்னைக்கு எதிராகத் தனது அதிகபட்ச ஸ்கோரான 250 ரன்களைக் குவித்து சாதனை படைத்தது.
டாஸ் வென்ற சிஎஸ்கே அணி முதலில் பந்துவீச்சைத் தேர்வு செய்தது. தொடக்க வீரராக களம் இறங்கிய விராட் கோலி (28) ஏமாற்றம் அளித்தாலும், தேவ்தத் படிக்கல் (50) மற்றும் பில் சால்ட் (46) ஜோடி அதிரடியாக ஆடி ஸ்கோரை உயர்த்தியது. ஆட்டத்தின் இறுதியில் கைக்கோர்த்த டிம் டேவிட் மற்றும் ரஜத் படிதார் ஜோடி சிஎஸ்கே பந்துவீச்சை நாலாபுறமும் சிதறடித்தது.
குறிப்பாக, டிம் டேவிட் வெறும் 25 பந்துகளில் 8 சிக்ஸர்களுடன் 70 ரன்கள் விளாசினார். ரஜத் படிதார் 19 பந்துகளில் 48 ரன்கள் சேர்க்க, ஆர்சிபி 20 ஓவர்களில் 3 விக்கெட் இழப்பிற்கு 250 ரன்கள் குவித்தது. கடைசி 5 ஓவர்களில் மட்டும் ஆர்சிபி 97 ரன்களை வாரிச் சுருட்டியது குறிப்பிடத்தக்கது.
251 ரன்கள் என்ற இலக்கை நோக்கி ஆடிய சென்னை அணிக்குத் தொடக்கமே அதிர்ச்சியாக அமைந்தது. சஞ்சு சாம்சன் (9), கேப்டன் ருதுராஜ் கெய்க்வாட் (7), ஆயுஷ் மாத்ரே (1) ஆகியோர் அடுத்தடுத்து ஆட்டமிழந்தனர். சர்பராஸ் கான் 25 பந்துகளில் 50 ரன்கள் எடுத்து நம்பிக்கையளித்தாலும், மிடில் ஓவர்களில் விக்கெட்டுகள் சீரான இடைவெளியில் விழுந்தன.
பிரஷாந்த் வீர் (43) மற்றும் ஜேமி ஓவர்டன் (37) ஆகியோர் போராடிய போதிலும், ஆர்சிபி பந்துவீச்சாளர் புவனேஷ்வர் குமாரின் (3 விக்கெட்டுகள்) துல்லியமான பந்துவீச்சால் சென்னையின் வெற்றி வாய்ப்பு மங்கியது.
19.4 ஓவர்களில் சென்னை அணி 207 ரன்களுக்கு அனைத்து விக்கெட்டுகளையும் இழந்தது. இதன் மூலம் 43 ரன்கள் வித்தியாசத்தில் பெங்களூரு அணி அபார வெற்றி பெற்றது. இந்த சீசனில் சென்னை அணிக்கு இது மூன்றாவது தொடர் தோல்வியாகும். புள்ளிப்பட்டியலில் பெங்களூரு அணி தனது ஆதிக்கத்தைத் தொடர்ந்து முதலிடத்திற்கு முன்னேறியுள்ளது. பந்துவீச்சில் சொதப்பிய சென்னை அணி, அடுத்தடுத்த போட்டிகளில் மீண்டு வர வேண்டிய கட்டாயத்தில் உள்ளது.