புதுடெல்லி: 4 பந்துவீச்சாளர்களுடன் இந்திய கிரிக்கெட் அணி களமிறங்க வேண்டும் என்று இந்திய அணியின் முன்னாள் கேப்டன் சுனில் கவாஸ்கர் அறிவுறுத்தியுள்ளார்.
இதுதொடர்பாக ஜியோஸ்டாருக்கு அளித்த பேட்டியில் சுனில் கவாஸ்கர் கூறியதாவது: இந்திய அணியின் பேட்டிங் வரிசை நன்றாக உள்ளது. ஆனால் பேட்டிங் வரிசையை நீட்டிக்க முயற்சிக்கும் போது அணியின் பந்துவீச்சு பலவீனமடைகிறது.
இதைத் தவிர்ப்பதற்கான வழிகளை நாம் தேட வேண்டும் அதேபோல், ஹர்திக் பாண்டியாவுக்கு மாற்றாக ஒரு வீரரை தேடும் முயற்சியில் இந்திய அணி நிர்வாகம் அளவுக்கு அதிகமாக ஈடுபடுகிறது. ஆனால், ஹர்திக் பாண்டியாவுக்கு ஈடு இணையான வீரர் தற்போது எவரும் இல்லை. எனவே, அவரைப் போன்ற ஒரு வீரரைத் தேடுவதற்குப் பதிலாக, வெவ்வேறு பொறுப்புகளைச் செய்யக்கூடிய திறமையான வீரர்களை தேடிக் கண்டுபிடித்து அணியில் சேர்க்கவேண்டும்.
போட்டிகளின்போது இந்திய அணி, குறைந்தபட்சம் நான்கு பிரத்யேக பந்துவீச்சாளர்களுடன் களமிறங்க வேண்டும். 4 பிரதான பந்து வீச்சாளர்களுடன் 2 ஆல்-ரவுண்டர்களை அணியில் சேர்க்கலாம். குறிப்பாக இளம் வீரர் நமன் திர் அதிரடியாக விளையாடுகிறார். அவர் பேட்டிங், பந்துவீச்சு ஆகிய இரண்டிலும் பங்களிப்பு செய்கிறார்.
அதேபோல் நடுவரிசையில் அக்சர் படேல் சிறப்பாக விளையாடக்கூடியவர். நான்கைந்து ஓவர்கள் வீசினாலும் அதில் விக்கெட் வீழ்த்தக் கூடிய பந்துவீச்சாளர் அவர். அணியின் 8-வது வீரர் வரை நாம் பேட்டிங் வரிசையை நீட்டிக்கும்போது, அணியின் பந்துவீச்சு பலவீனமடைகிறது. அந்த இடத்தில்தான் இந்திய அணி தோல்வியைச் சந்திக்க நேரிடுகிறது.
மற்ற தொடர்களுடன் ஒப்பிடும்போது இந்தத் தொடரில் அபிஷேக் சர்மாவிடமிருந்து எதிர்பார்த்த அளவுக்கு ஆட்டம் வெளிப்படவில்லை. 200 என்ற ஸ்டிரைக் ரேட்டில் விளையாடும் எந்தவொரு வீரருக்கும் சில தொடர்களில் குறைந்த ரன்கள் எடுக்க வேண்டிய நிலை வரும். அவர் தொடர்ச்சியாக ஒவ்வொரு போட்டியிலும் அதிக ரன்களைக் குவிப்பார் என்று எதிர்பார்ப்பது நமது தவறான புரிதலாகும். இவ்வாறு கவாஸ்கர் தெரிவித்தார்.