மெல்பர்ன்: ஆஷஸ் கிரிக்கெட் டெஸ்ட் தொடரில் இங்கிலாந்து, ஆஸ்திரேலிய அணிகள் மோதும் 4-வது டெஸ்ட் போட்டி இன்று மெல்பர்னில் தொடங்கவுள்ளது. கிறிஸ்துமஸ் பண்டிகை நாளுக்கு அடுத்த நாள் இப்போட்டி தொடங்குவதால் பாக்ஸிங் டே டெஸ்ட் போட்டியாக இது அமைகிறது.
இங்கிலாந்து அணி, ஆஸ்திரேலியாவில் சுற்றுப்பயணம் செய்து 5 போட்டிகள் கொண்ட ஆஷஸ் கிரிக்கெட் தொடரில் விளையாடி வருகிறது. முதல் 3 போட்டிகளிலும் ஆஸ்திரேலிய அணி வெற்றி பெற்று தொடரை 3-0 என்ற கணக்கில் கைப்பற்றிவிட்டது. இந்நிலையில் இவ்விரு அணிகளுக்கு இடையிலான 4-வது கிரிக்கெட் டெஸ்ட் போட்டி புகழ்பெற்ற மெல்பர்ன் மைதானத்தில் இன்று தொடங்கவுள்ளது.
கிறிஸ்துமஸ் தினத்துக்கு மறுநாள் இது பாக்ஸிங் டே டெஸ்ட் போட்டியாக அமைகிறது. இந்தத் தொடரில் பேட்டிங், பந்துவீச்சு, ஃபீல்டிங் என அனைத்து துறைகளிலும் ஆஸ்திரேலிய அணி பலம் மிகுந்து காணப்படுகிறது. இதனால், இங்கிலாந்து அணி வெற்றிக்குத் திரும்ப நினைத்த வாய்ப்புகளை ஆஸ்திரேலிய வீரர்கள் பறித்தனர்.
பாட் கம்மின்ஸ் காயம் அடைந்துள்ளதால் 4-வது டெஸ்ட் போட்டியில் ஆஸ்திரேலிய அணிக்கு கேப்டனாக ஸ்டீவன் ஸ்மித் செயல்படுகிறார். காயம் காரணமாக பாட் கம்மின்ஸ், நேதன் லயன் ஆகியோர் அணியில் இடம்பெறவில்லை. பாட் கம்மின்ஸ் முதுகு வலியால் அவதிப்படுவதாலும், நேதன் லயனுக்கு அறுவை சிகிச்சை செய்யப்பட உள்ளதாலும், அவர்கள் அணியில் இடம்பெறவில்லை.
பேட்டிங்கில் டிராவிஸ் ஹெட், ஜேக் வெதரால்டு, மார்னஸ் லபுஷேன், ஸ்டீவன் ஸ்மித், உஸ்மான் கவாஜா, அலெக்ஸ் கேரி, கேமரூன் கிரீன் என பலம் மிகுந்து காணப்படுகிறது. கடந்த 3 டெஸ்ட் போட்டிகளிலும் இவர்களது பங்களிப்பு அளப்பரியது. எனவே, 4-வது டெஸ்ட் போட்டியிலும் இவர்களிடமிருந்து சிறப்பான இன்னிங்ஸ் வெளிப்படும் என்று எதிர்பார்க்கலாம்.
அதேபோல் பந்துவீச்சில், மிட்செல் ஸ்டார்க், மைக்கேல் நேசர், ஜைரிச்சர்ட்சன், பிரண்டன் டாகெட், ஸ்காட் போலண்ட் ஆகியோர் எதிரணி வீரர்களுக்கு அழுத்தம் கொடுக்கத் தயாராக உள்ளனர். முதன்முறையாக இந்தத் தொடரில் சுழற்பந்து வீச்சாளர் இல்லாமலேயே ஆஸ்திரேலிய அணி களமிறங்குகிறது. அதேநேரத்தில் 3 போட்டிகளிலும் தொடர்ச்சியாக தோல்வி கண்டுள்ள இங்கிலாந்து அணி, 4-வது டெஸ்ட் போட்டியில் வெற்றி பெறும் முயற்சியில் களமிறங்குகிறது.
இந்தத் தொடரில் இங்கிலாந்து அணியின் பேட்டிங், பந்துவீச்சு இரண்டுமே பலவீனமாக காணப்படுகிறது. இங்கிலாந்து வீரர்கள் குறைந்த ரன்களில் ஆட்டமிழப்பதும், மோசமான பந்துவீச்சை செயல்படுத்துவதாலும் அந்த அணிக்கு இதுவரை வெற்றி கிடைக்கவில்லை.
மேலும் இன்றைய போட்டியில் இங்கிலாந்து அணியின் வேகப்பந்து வீச்சாளர் ஜோப்ரா ஆர்ச்சர் இடம்பெறவில்லை. காயம் காரணமாக அவர் 4, 5-வது டெஸ்ட் போட்டிகளில் விளையாட மாட்டார் என அறிவிக்கப்பட்டுள்ளது. இது இங்கிலாந்து அணிக்கு பெரிய பின்னடைவாக கருதப்படுகிறது.
பேட்டிங்கில் ஜாக் கிராவ்லி, பென் டக்கெட், ஜேக்கப் பெத்தேல், ஜோ ரூட், ஹாரி புரூக், பென் ஸ்டோக்ஸ் ஆகியோர் இருந்தாலும் இந்தத் தொடரில் ஆஸ்திரேலிய அணிக்கு எதிராக யாரும் பெரிதாக ரன்களைக் குவிக்க முடியவில்லை.
எனவே, இந்தப் போட்டியில் இங்கிலாந்து அணியின் முன்னிலை வீரர்கள் அனைவரும் ஃபார்முக்குத் திரும்ப முயற்சிக்கக்கூடும். அதேபோல் பவுலிங்கில் வில் ஜேக்ஸ், கஸ் அட்கின்சன், பிரைடன் கார்ஸ், ஜோஷ் டங், பென் ஸ்டோக்ஸ் ஆகியோர் எதிரணி வீரர்களுக்கு அழுத்தம் கொடுப்பார்கள் என எதிர்பார்க்கப்படுகிறது.
அணி விவரம்: ஆஸ்திரேலியா: டிராவிஸ் ஹெட், ஜேக் வெதரால்டு, மார்னஸ் லபுஷேன், ஸ்டீவன் ஸ்மித் (கேப்டன்), உஸ்மான் கவாஜா, அலெக்ஸ் கேரி, கேமரூன் கிரீன், மைக்கேல் நேசர், மிட்செல் ஸ்டார்க், ஜை ரிச்சர்ட்சன், பிரண்டன் டாகெட், ஸ்காட் போலண்ட்.
இங்கிலாந்து: ஜாக் கிராவ்லி, பென் டக்கெட், ஜேக்கப் பெத்தேல், ஜோ ரூட், ஹாரி புரூக், பென் ஸ்டோக்ஸ் (கேப்டன்), ஜேமி ஸ்மித், வில் ஜேக்ஸ், கஸ் அட்கின்சன், பிரைடன் கார்ஸ், ஜோஷ் டங்.