மெல்பர்ன்: ஆஸ்திரேலிய நாட்டின் ‘ஹால் ஆஃப் பேம்’-ல் முன்னாள் வேகப்பந்து வீச்சாளர் பிரெட் லீ சேர்க்கப்பட்டுள்ளார்.
புகழ்பெற்ற முன்னாள் வீரர்களை கவுரவிக்கும் விதமாகவும், அவர்களது சாதனைகளைப் போற்றும்விதமாகவும் சர்வதேச கிரிக்கெட் கவுன்சில் (ஐசிசி) ‘ஹால் ஆஃப் பேம்’ அங்கீகாரத்தை வழங்கி வருகிறது. ஐசிசி-யின் இந்த ‘ஹால் ஆஃப் பேம்’ அங்கீகாரத்தில் டான் பிராட்மேன், கபில்தேவ், சச்சின், ராகுல் திராவிட், டென்னிஸ் லில்லி, ரிச்சர்ட் ஹாட்லி, விவியன் ரிச்சர்ட்ஸ் உள்ளிட்ட பல வீரர்கள் இடம்பெற்றுள்ளன.
ஐசிசியின் ‘ஹால் ஆஃப் பேம்’ போலவே, ஆஸ்திரேலியாவிலும் ‘ஆஸ்திரேலியா ஹால் ஆஃப் பேம்’அங்கீகாரத்தை ஆஸ்திரேலிய கிரிக்கெட் வாரியம் வழங்கி வருகிறது. அந்த ‘ஹால் ஆஃப் பேம்’ அங்கீகாரத்தில் அண்மையில் பிரெட் லீ சேர்க்கப்பட்டுள்ளார்.
ஆஸ்திரேலியாவின் ‘ஹால் ஆஃப் பேம்’-ல் டான் பிராட்மேன், ரிக்கி பாண்டிங், கீத் மில்லர், டென்னிஸ் லில்லி, இயன் சேப்பல், கிரேக் சேப்பல், ஷேன் வார்னே, ஸ்டீவ் வாஹ், மார்க் வாஹ், மைக்கேல் ஹஸ்ஸி உள்ளிட்ட 60 வீரர்கள் இடம்பெற்றுள்ளனர். தற்போது இந்த ‘ஹால் ஆஃப் பேம்’-ல் பிரெட் லீயும் இணைந்துள்ளார்.
இதுதொடர்பாக ஆஸ்திரேலிய கிரிக்கெட் வாரியம்(சிஏ) வெளியிட்டுள்ள எக்ஸ் பதிவில் கூறும்போது, “நிரூபிக்கப்பட்ட வெற்றியாளர், கட்டுப்பாடற்ற இளைஞனாக பந்துவீசியவர். அனைத்து விதமான கிரிக்கெட்
போட்டிகளிலும் உண்மையான எண்டர்டெயினராக இருக்கும் பிரெட் லீ கிரிக்கெட் ஆஸ்திரேலியாவின் ஹால் ஆஃப் பேமில் இணைகிறார்” என்று கூறப்பட்டுள்ளது.
ஆஸ்திரேலிய அணிக்காக 76 டெஸ்ட் போட்டிகளில் விளையாடியுள்ள பிரெட் லீ 310 விக்கெட்களை எடுத்துள்ளார். அதில் 10 முறை 5 விக்கெட்களை எடுத்துள்ளார். மேலும், 221 ஒருநாள் போட்டிகளில் விளையாடி 380 விக்கெட்களை கைப்பற்றிள்ளார். இதில் 14 முறை 4 விக்கெட்களும் 9 முறை 5 விக்கெட்களும் எடுத்துள்ளார்.
25 சர்வதேச டி20 போட்டிகளில் பங்கேற்று 28 விக்கெட்களை சாய்த்துள்ளார். மொத்தமாக 322 போட்டிகளில் விளையாடி 718 விக்கெட்களை எடுத்து அசத்தியுள்ளார். அதுமட்டுமல்லாமல் பேட்டிங்கில் 2,728 ரன்கள் குவித்துள்ளார். இதில் 8 அரைசதங்கள் அடங்கும். இவர் 2003 ஐசிசி ஒருநாள் உலகக் கோப்பை, 2006, 2009 சாம்பியன்ஸ் டிராபியைக் கைப்பற்றி ஆஸ்திரேலிய அணியில் இருந்துள்ளார்.