கேப்டவுடன்: 2027-ம் ஆண்டு 50 ஓவர் உலகக் கோப்பை கிரிக்கெட் தொடரை தென் ஆப்பிரிக்கா, ஜிம்பாப்வே, கென்யா ஆகிய நாடுகள் இணைந்து நடத்த உள்ளன. இந்த தொடருக்கான போட்டி அட்டவணையை ஐசிசி நேற்று தென் ஆப்பிரிக்காவின் கேப்டவுடன் நகரில் வெளியிட்டது. இதன்படி உலகக் கோப்பை தொடர் 2027-ம் ஆண்டு அக்டோபர் 2-ல் தொடங்கி நவம்பர் 21 வரை நடைபெறுகிறது.
இந்தியா ‘ஏ’ பிரிவில் இடம் பெற்றுள்ளது. இதே பிரிவில் பாகிஸ்தான், ஆஸ்திரேலியா, ஆப்கானிஸ்தான், ஜிம்பாப்வே, தகுதி சுற்று அணி ஆகியவையும் இடம் பெற்றுள்ளன. ‘பி’ பிரிவில் நியூஸிலாந்து, தென் ஆப்பிரிக்கா, இலங்கை, இங்கிலாந்து, வங்கதேசம், தகுதி சுற்று அணி ஆகியவையும் உள்ளன.
இந்தியா தனது முதல் ஆட்டத்தில் அக்டோபர் 7-ல் ஆஸ்திரேலியாவை எதிர்கொள்கிறது. 10-ம் தேதி இந்தியா - பாகிஸ்தான் அணிகள் ஜோகன்னஸ் பர்க் நகரில் மோதுகிறது. 14-ம் தேதி ஆப்கானிஸ்தானுடனும், 17-ம் தேதி தகுதி சுற்று அணியுடனும், 24-ம் தேதி ஜிம்பாப்வேயுடனும் இந்திய அணி மோதுகிறது.
2-வது சுற்றான சூப்பர் 7 ஆட்டங்கள் அக்டோபர் 25 முதல் நவம்பர் 14 வரையும், அரை இறுதி ஆட்டங்கள் நவம்பர் 17, 18-ம் தேதிகளிலும் நடைபெறுகிறது. இறுதிப் போட்டி நவம்பர் 21-ல் ஜோகன்னஸ்பர்க்கில் நடைபெறுகிறது.
மல்யுத்தத்தில் நிதேஷுக்கு வெள்ளி: ஆசிய விளையாட்டில் ஆடவருக்கான மல்யுத்தத்தில் கிரகோ ரோமன் 97 கிலோ எடைப் பிரிவு இறுதிப் போட்டியில் இந்தியாவின் நிதேஷ் சிவாச் 0-4 என்ற கணக்கில் ஜப்பானின் யூரி நகசாடோவிடம் தோல்வி அடைந்து வெள்ளிப் பதக்கம் வென்றார். இந்தப் பிரிவில் 1962-ம் ஆண்டுக்குப் பிறகு தற்போதுதான் இந்தியா பதக்கம் வென்றுள்ளது.
வாலிபாலில் ஏமாற்றம்: ஆசிய விளையாட்டு போட்டியில் ஆடவருக்கான வாலிபால் கால் இறுதி சுற்றில் இந்தியா 19-25, 23-25, 18-25 என்ற செட் கணக்கில் பாகிஸ்தானிடம் தோல்வி அடைந்தது. இதனால் 1986-ம் ஆண்டுக்கு பின்னர் பதக்கம் வெல்லும் இந்தியாவின் கனவு கலைந்தது.
ஸ்குவாஷில் வெண்கலம்: ஆசிய விளையாட்டு போட்டியில் ஸ்குவாஷில் இந்திய மகளிர் அணி அரை இறுதியில் ஹாங் காங்குடன் மோதியது. இதில் இந்திய மகளிர் அணி 1-2 என்ற கணக்கில் தோல்வி அடைந்து வெண்கலப் பதக்கம் பெற்றது. அனஹத் சிங் 11-9, 11-8, 6-11, 11-13, 10-12 என்ற கணக்கில் சின் யுக் சானிடம் தோல்வி அடைந்தார்.
தன்வி கன்னா 4-11, 13-11, 11-9, 13-11 என்ற கணக்கில் கா யி லீயை வீழ்த்தினார். ஆனால் அடுத்த ஆட்டத்தில் ஜோஷ்னா சின்னப்பா 4-11, 7-11, 9-11 என்ற செட் கணக்கில் ஹோ ட்சே லோக்கிடம் வீழ்ந்தார்.அபய் சிங், வீர் சோட்ரானி, வேலவன் செந்தில் குமார் ஆகியோரை உள்ளடக்கிய இந்திய ஆடவர் அணி அரை இறுதியில் 1-2 என்ற கணக்கில் மலேசியாவிடம் தோல்வி அடைந்து வெண்கலப் பதக்கம் கைப்பற்றியது. இதில் ஜோஷ்னா சின்னப்பா, அபய் சிங், வேலவன் செந்தில்குமார் ஆகியோர் தமிழகத்தைச் சேர்ந்தவர்கள்.
பாய்மரப்படகில் வெள்ளி: ஆசிய விளையாட்டு போட்டியில் பாய்மரப்படகின் ஸ்கிஃப் பிரிவில் இந்தியாவின் மனு பிரான்சிஸ், பிரின்ஸ் குரிசிங்கல் நோபல் ஜோடி வெள்ளிப் பதக்கம் வென்றது. இந்திய அணி 9 பந்தய சுற்றுகளின் முடிவில் மொத்தம் 23 புள்ளிகளை பெற்று 2-வது இடம் பிடித்து வெள்ளிப் பதக்கத்தை தட்டிச் சென்றது. சீனா தங்கப் பதக்கமும், ஹாங் காங் வெண்கலப் பதக்கமும் கைப்பற்றின. சகோதரர்களான மனு பிரான்சிஸ், பிரின்ஸ் குரிசிங்கல் நோபல் ஆகிய இருவரும் கேரள மாநிலம் எர்ணாகுளத்தை சேர்ந்தவர்கள். மகளிருக்கான பாய்மரப்படகின் ஸ்கிஃப் பிரிவில் இந்தியாவின் ஹர்ஷிதா தோமர், ஷீத்தல் வர்மா ஜோடி வெண்கலப் பதக்கம் வென்றது.
வில்வித்தையில் வெண்கலம்: வில்வித்தையில் ஆடவருக்கான காம்பவுண்ட் தனிநபர் பிரிவில் இந்தியாவின் கணேஷ் மணி ரத்னம் திருமுரு 149-144 என்ற புள்ளிகள் கணக்கில் வியட்நாமின் காங் டக் டாங்கை வீழ்த்தி வெண்கலப் பதக்கம் வென்றார்.