மெல்பர்ன்: ஆஷஸ் கிரிக்கெட் டெஸ்ட் தொடரிலிருந்து இங்கிலாந்து வேகப்பந்து வீச்சாளர் கஸ் அட்கின்ஸன் காயம் காரணமாக விலகியுள்ளார்.
ஆஸ்திரேலியாவில் சுற்றுப்பயணம் மேற்கொண்டுள்ள இங்கிலாந்து கிரிக்கெட் அணி 5 போட்டிகள் கொண்ட ஆஷஸ் டெஸ்ட் தொடரில் விளையாடி வருகிறது. இதில் முதல் 3 போட்டிகளிலும் வெற்றி பெற்ற ஆஸ்திரேலிய அணி தொடரை 3-0 என்ற கணக்கில் ஏற்கெனவே கைப்பற்றியுள்ளது. இதைத் தொடர்ந்து கடந்த 26-ம் தேதி 4-வது டெஸ்ட் போட்டி மெல்பர்னில் தொடங்கியது.
இந்த டெஸ்ட் போட்டியில் இங்கிலாந்து 4 விக்கெட் வித்தியாசத்தில் வெற்றி பெற்றுள்ளது. 14 ஆண்டுகளுக்கு பிறகு ஆஸ்திரேலிய மண்ணில் இங்கிலாந்து அணி வெற்றியைப் பெற்றுள்ளது. இருப்பினும் 5 போட்டிகள் கொண்ட தொடரில் ஆஸ்திரேலியா 3-1 என்ற கணக்கில் முன்னிலையில் உள்ளது.
இந்நிலையில், ஆஸ்திரேலியா, இங்கிலாந்து அணிகள் மோதும் 5-வது மற்றும் கடைசி டெஸ்ட் போட்டி வரும் ஜனவரி 4ம் தேதி சிட்னியில் தொடங்குகிறது. இதனிடையே ஆஷஸ் தொடரின் எஞ்சிய போட்டிகளில் இருந்து இங்கிலாந்து அணியின் வேகப்பந்து வீச்சாளர் கஸ் அட்கின்ஸன் காயம் காரணமாக விலகி உள்ளார்.
மெல்பர்னில் நடைபெற்ற 4-வது டெஸ்ட் போட்டியில் 3 விக்கெட்களைச் சாய்த்திருந்தார் கஸ் அட்கின்ஸன். ஆஷஸ் தொடரில் இருந்து கஸ் அட்கின்ஸன் விலகியிருப்பது இங்கிலாந்து அணிக்கு பின்னடைவை ஏற்படுத்தி உள்ளதாக கிரிக்கெட் விமர்சகர்கள் தெரிவித்துள்ளனர்.