விளையாட்டு

சிஎஸ்கே ஆலோசகர் தோனியின் முன் உள்ள சவால் என்ன? - ஒரு விரைவுப் பார்வை

வேட்டையன்

சென்னை: சென்னை சூப்பர் கிங்ஸ் அணியின் ஆலோசகராக எதிர்வரும் ஐபிஎல் 2027-ம் ஆண்டு சீசனில் செயல்பட உள்ளார் மகேந்திர சிங் தோனி. இந்நிலையில், இந்த சீசனை முன்னிட்டு அவர் முன் உள்ள சவால் என்னவென்று விரிவாக பார்ப்போம்.

45 வயதான தோனி, கடந்த சில தினங்களுக்கு முன்னர் ஐபிஎல் கிரிக்கெட்டில் இருந்து ஓய்வு பெறுவதாக அறிவித்தார். சிஎஸ்கே அணியின் கேப்டனாக 5 முறை ஐபிஎல் பட்டம் வென்றது அவர் தலைமையிலான சென்னை சூப்பர் கிங்ஸ் அணி. இதன் மூலம் ஐபிஎல் கிரிக்கெட் வரலாற்றில் அதிக முறை பட்டம் வென்ற அணிகளில் ஒன்றாக சிஎஸ்கே அறியப்படுகிறது. இந்நிலையில், அவர் ஓய்வு முடிவை அறிவித்தார்.

ஐபிஎல் கிரிக்கெட் என்றாலே பெரும்பாலானோருக்கு தோனியின் பெயர் நிச்சயம் ஒரு கணம் வந்து செல்லும். அதன் அளவுக்கு தனது ஆட்டத்திறனையும், கேப்டனாக சிறந்த செயல்பாட்டையும் தோனி வெளிப்படுத்தி உள்ளார்.

கடந்த சில ஆண்டுகளாவே தோனி எப்போது ஓய்வு குறித்த பேச்சுகள் எழுந்தன. இருப்பினும் அடுத்த ஆண்டு நடைபெற உள்ள மெகா ஏலத்துக்கு முன்னர் வரை தோனி, சிஎஸ்கே அணியில் விளையாடுவார் என்று எதிர்பார்க்கப்பட்டது. ஆனால், அப்படியெல்லாம் ஒன்றுமில்லை என்று தனது பாணியில் ஐபிஎல் கிரிக்கெட்டில் இருந்து விடைபெற்றார். அதுதான் தோனி.

ஆலோசகர் தோனி முன் உள்ள சவால் என்ன?

இனி சென்னை சூப்பர் கிங்ஸ் அணியின் ஆலோசகராக அவர் செயல்பட உள்ளார். தோனி இல்லாமல் சென்னை சூப்பர் கிங்ஸ் அணி இல்லை என்று அணியின் உரிமையாளர் என்.சீனிவாசன் கூறியிருந்தார். அந்த வகையில் ஆலோசகராக அணியுடன் அவர் இனி செயல்பட உள்ளார்.

கடைசியாக கடந்த 2023 சீசனில் சென்னை சூப்பர் கிங்ஸ் அணி பட்டம் வென்றது. அதன் பின்னர் பிளே-ஆப் சுற்றுக்கு கூட சிஎஸ்கே அணி முன்னேறவில்லை. இந்நிலையில், 2027 சீசனில் புதிய மாற்றத்தை கொண்டுவர சிஎஸ்கே அணி விரும்புகிறது.

இதில் அணியின் பயிற்சியாளர் ஜாஹிர் கான் மற்றும் ஆலோசகர் தோனியின் பங்கு மிக முக்கியமானது. இளம் பேட்ஸ்மேன்கள் அதிகம் நிறைந்த அணியின் அணி சேர்க்கை குறித்த எதிர்பார்ப்பு இப்போது சிஎஸ்கே ரசிகர்கள் மத்தியில் ஏற்பட்டுள்ளது. அடுத்த மாதம் நடைபெற உள்ள மினி ஏலத்தில் எந்த வீரரை வாங்குவது என்பது குறித்த வியூகத்தில் சிஎஸ்கே அணி நிர்வாகம் ஈடுபட்டுள்ளது.

தோனியின் ஓய்வுக்கு பின் சிஎஸ்கே அணியின் பயணம் எப்படி இருக்கும் என்ற எதிர்பார்ப்பும் நிலவுகிறது.

“அணியின் செயல்பாட்டில் ஆலோசகர் தோனியின் பந்து நிச்சயம் இருக்கும். களத்தில் அவரது இடத்தை எந்தவொரு வீரராலும் ஈடு செய்ய முடியாது. இருந்தாலும் இளம் வீரர்களுக்கு அவரது ஆலோசனைகள் அணிக்கும் நிச்சயம் உதவும்” என்று சிஎஸ்கே நிர்வாக இயக்குனர் கே.எஸ்.விஸ்வநாதன் கூறியுள்ளார்.

“தோனியின் கவனம் இளம் வீரர்கள் மீது தான் இருக்கும். கடந்த சீசனில் அவரது வழிகாட்டுதலை பல்வேறு வீரர்கள் பெற்றனர். கள சூழலுக்கு ஏற்ப எப்படி விளையாடுவது என்ற பாடத்தை தோனியிடம் இருந்து இளம் வீரர்கள் பெறுவார்கள்” என்று வித்யூத் சிவராமகிருஷ்ணன் தெரிவித்துள்ளார்.

சில முடிவுகள் சில நல்ல தொடக்கத்துக்கு அடித்தளமாக அமையும். அந்த வகையில் தோனியின் ஓய்வு முடிவு, அணியின் ஆலோசகர் என்பதன் தொடக்கமாக அமைந்துள்ளது. இப்போது தந்து மாயத்தை ஆடுகளத்துக்கு வெளியில் இருந்து தோனி மேற்கொள்ள வேண்டி உள்ளது. அது எப்படி அமைகிறது என்பதை காத்திருந்து பார்ப்போம்.

Amazon.in: ஆன்லைன் ஷாப்பிங் - இலவச ஷிப்பிங் வசதி.

SCROLL FOR NEXT