மெல்பர்ன்: ஆஸ்திரேலிய ஓபன் டென்னிஸ் தொடரின் மகளிர் ஒற்றையர் பிரிவு இறுதிப் போட்டியில் விளையாட முதல் நிலை வீராங்கனையான பெலாரஸின் அரினா சபலென்காவும், 5-ம் நிலை வீராங்கனையான கஜகஸ்தானின் எலெனா ரைபகினாவும் தகுதி பெற்றுள்ளனர்.
ஆண்டின் முதல் கிராண்ட் ஸ்லாம் டென்னிஸ் தொடரான ஆஸ்திரேலிய ஓபன் மெல்பர்ன் நகரில் நடைபெற்று வருகிறது. இதன் 12-வது நாளான நேற்று மகளிர் ஒற்றையர் பிரிவு அரை இறுதி ஆட்டத்தில் முதல் நிலை வீராங்கனையான பெலாரஸின் அரினா சபலென்கா, 12-ம் நிலை வீராங்கனையான உக்ரைனின் எலினா ஸ்விட்டோலினாவுடன் மோதினார்.
ஒரு மணி நேரம் 16 நிமிடங்கள் நடைபெற்ற இந்த ஆட்டத்தில் சபலென்கா 6-2, 6-3 என்ற நேர் செட் கணக்கில் வெற்றி பெற்று இறுதிப் போட்டிக்கு முன்னேறினார். ஆஸ்திரேலிய ஓபன் தொடரின் இறுதிச் சுற்றில் அரினா சபலென்கா தொடர்ச்சியாக 4-வது முறையாக கால்பதித்துள்ளார். கடந்த 2023 மற்றும் 2024-ம் ஆண்டு தொடரில் அவர், சாம்பியன் பட்டம் வென்றிருந்தார்.
அதேவேளையில் கடந்த 2025-ம் ஆண்டு இறுதிப் போட்டியில் தோல்வி அடைந்து 2-வது இடம் பெற்றிருந்தார். ஒட்டுமொத்தமாக அரினா சபலென்கா விளையாடும் 8-வது கிராண்ட் ஸ்லாம் இறுதிப் போட்டியாக இந்த ஆண்டு ஆஸ்திரேலிய ஓபன் அமைந்துள்ளது.
இம்முறை இறுதிப் போட்டியில் அரினா சபலென்கா, 5-ம் நிலை வீராங்கனையான கஜகஸ்தானின் எலெனா ரைபகினாவுடன் பலப்பரீட்சை நடத்துகிறார். ரைபகினா அரை இறுதி சுற்றில் 6-ம் நிலை வீராங்கனையான அமெரிக்காவின் ஜெசிகா பெகுலாவுடன் மோதினார். ஒரு மணி நேரம் 40 நிமிடங்கள் நடைபெற்ற இந்த ஆட்டத்தில் எலெனா ரைபகினா 6-3, 7-6 (9-7) என்ற செட் கணக்கில் வெற்றி பெற்று இறுதிப் போட்டியில் நுழைந்தார்.
சர்வதேச டென்னிஸ் அரங்கில் சபலென்காவும், ரைபகினாவும் இதுவரை 14 முறை நேருக்கு நேர் மோதி உள்ளனர். இதில் சபலென்கா 8 முறையும், ரைபகினா 6 முறையும் வெற்றி பெற்றுள்ளனர். இதில் 2023-ம் ஆண்டு நடைபெற்ற ஆஸ்திரேலிய ஓபன் இறுதிப் போட்டியும் அடங்கும். அந்த ஆட்டத்தில் சபலென்கா 4-6, 6-3, 6-4 என்ற செட் கணக்கில் போராடி வெற்றி பெற்று பட்டம் வென்றிருந்தார். இந்த தோல்விக்கு இம்முறை ரைபகினா பதிலடி கொடுக்க முயற்சிக்கக்கூடும்.
ரைபகினா கடைசியாக விளையாடிய 20 போட்டிகளில் 19-ல் வெற்றி கண்டுள்ளார். இதில் கடந்த ஆண்டு நவம்பரில் ரியாத்தில் நடைபெற்ற டபிள்யூடிஏ பைனல்ஸ் தொடரில் அரினா சபலென்காவை வீழ்த்தியதும் அடங்கும்.