ஆஸ்திரேலிய வேகப்பந்து வீச்சாளர் மிட்செல் ஸ்டார்க்
சிட்னி: வங்கதேச கிரிக்கெட் அணி ஆஸ்திரேலியாவுக்கு சுற்றுப்பயணம் மேற்கொண்டு 2 போட்டிகள் கொண்ட டெஸ்ட் தொடரில் விளையாட உள்ளது. இரு அணிகளுக்கும் இடையிலான முதல் டெஸ்ட் போட்டி வரும் 13-ம் தேதி டார்வினில் தொடங்குகிறது.
இந்த டெஸ்ட் தொடரில் இந்திய அணியின் முன்னாள் கேப்டனான கபில் தேவின் சாதனையை முறியடிக்க காத்திருக்கிறார் ஆஸ்திரேலிய அணியின் நட்சத்திர வேகப்பந்து வீச்சாளரான மிட்செல் ஸ்டார்க்.
இடதுகை வேகப்பந்து வீச்சாளரான அவர், இதுவரை 105 டெஸ்ட் போட்டிகளில் விளையாடி 433 விக்கெட்டுகளைக் கைப்பற்றியுள்ளார். இதன் வாயிலாக டெஸ்ட் கிரிக்கெட் வரலாற்றில் அதிக விக்கெட்கள் வீழ்த்தியவர்களின் பட்டியலில் 12-வது இடத்தில் உள்ளார்.
இந்திய அணியின் முன்னாள் கேப்டனான கபில் தேவ் டெஸ்ட் போட்டிகளில் 434 விக்கெட்டுகளைக் கைப்பற்றி 11-வது இடத்தில் இருக்கிறார். வங்கதேசத்துக்கு எதிரான டெஸ்ட் தொடரின்போது, மிட்செல் ஸ்டார்க் 2 விக்கெட்டுகளைக் கைப்பற்றினால் கபில் தேவின் அதிக விக்கெட்டுகள் சாதனையை முறியடிப்பார்.
அதேவேளையில் ஒட்டுமொத்தமாக 7 விக்கெட்களை வீழ்த்தினால் தென் ஆப்பிரிக்காவின் முன்னாள் வீரரான டேல் ஸ்டெயினை (439 விக்கெட்கள்) பின்னுக்குத்தள்ளி டாப் 10-ல் இடம் பெறுவார். ஸ்டெயின் தற்போது 10-வது இடத்தில் உள்ளார்.