பெர்த்: ஆஸ்திரேலியா - இங்கிலாந்து அணிகள் இடையிலான பாரம்பரியமிக்க 5 போட்டிகள் கொண்ட ஆஷஸ் டெஸ்ட் கிரிக்கெட் தொடரின் முதல் போட்டி பெர்த்தில் இன்று காலை 7.50 மணிக்கு தொடங்குகிறது.
பென் ஸ்டோக்ஸ் தலைமையிலான இங்கிலாந்து கிரிக்கெட் அணி 5 போட்டிகள் கொண்ட ஆஷஸ் தொடரில் விளையாடுவதற்காக ஆஸ்திரேலியாவில் சுற்றுப்பயணம் மேற்கொண்டுள்ளது. இரு அணிகள் இடையிலான பாரம்பரியமிக்க இந்த ஆஷஸ் தொடர் 74-வது முறையாக நடைபெறுகிறது. கடைசியாக ஆஸ்திரேலிய மண்ணில் இங்கிலாந்து அணி கடந்த 2010-2011-ம் ஆண்டு நடைபெற்ற ஆஷஸ் தொடரை 3-1 என வென்றது.
அதன் பின்னர் ஆஸ்திரேலிய மண்ணில் நடைபெற்ற 3 தொடர்களையும் இங்கிலாந்து அணி இழந்தது. இதில் 13 போட்டிகளில் தோல்வியையும், 2 ஆட்டத்தை டிராவும் செய்திருந்தது இங்கிலாந்து அணி. எனினும் இம்முறை வயதான வீரர்கள், பலவீனமான பந்து வீச்சுடன் காணப்படும் ஆஸ்திரேலிய அணிக்கு எதிராக இங்கிலாந்து வீரர்கள் ஆதிக்கம் செலுத்த முயற்சிக்கக்கூடும்.
பந்து வீச்சை பொறுத்தவரையில் ஜோப்ரா ஆர்ச்சர், மார்க் அவுட், கஸ் அட்கின்சன், பென் ஸ்டோக்ஸ் ஆகியோர் ஆஸ்திரேலிய அணியின் பேட்டிங் வரிசைக்கு அழுத்தம் கொடுக்க முயற்சிக்கக்கூடும். பேட்டிங்கில் ஜாக் கிராலி, பென் டக்கெட், ஆலி போப், ஜோ ரூட், ஹாரி புரூக், பென் ஸ்டோக்ஸ், ஜேமி ஸ்மித் ஆகியோர் நம்பிக்கை அளிக்கக்கூடியவர்களாக திகழ்கின்றனர்.
ஆஸ்திரேலிய அணி ஸ்டீவ் ஸ்மித் தலைமையில் களமிறங்குகிறது. அந்த அணியில் பிரதான வேகப்பந்து வீச்சாளர்களான கேப்டன் பாட் கம்மின்ஸ், ஜோஷ் ஹேசில்வுட் ஆகியோர் காயம் காரணமாக விளையாடவில்லை. இதனால் மிட்செல் ஸ்டார்க், நேதன் லயன் ஆகியோரை நம்பியே பந்துவீச்சு திட்டங்கள் அமையக்கூடும். முதல் டெஸ்ட் போட்டிக்கான விளையாடும் லெவனை ஆஸ்திரேலிய கிரிக்கெட் வாரியம் நேற்று அறிவித்தது.
இதில் தொடக்க பேட்ஸ்மேன் ஜாக் வெதரால்ட், வேகப்பந்து வீச்சாளர் பிரெண்டன் டாகெட் ஆகியோர் அறிமுக வீரர்களாக இடம் பெற்றுள்ளனர். ஆல்ரவுண்டராக கேமரூன் கிரீன் சேர்க்கப்பட்டுள்ளார்.
பேட்டிங்கில் கேப்டன் ஸ்டீவ் ஸ்மித், உஸ்மான் கவாஜா, மார்னஸ் லபுஷேன் ஆகியோர் தங்களது அனுபவத்தால் பலம் சேர்க்கக்கூடும். டிராவிஸ் ஹெட், அலெக்ஸ் கேரி, கேமரூன் கிரீன் ஆகியோரும் கைகொடுக்கும் பட்சத்தில் அணி கூடுதல் பலம் பெறும்.
அணிகள் விவரம் - ஆஸ்திரேலியா: ஸ்டீவ் ஸ்மித் (கேப்டன்), ஜாக் வெதரால்ட், உஸ்மான் கவாஜா, மார்னஸ் லபுஷேன், டிராவிஸ் ஹெட், கேமரூன் கிரீன், அலெக்ஸ் கேரி, மிட்செல் ஸ்டார்க், நேதன் லயன், பிரெண்டன் டாகெட், ஸ்காட் போலண்ட்.
இங்கிலாந்து: பென் ஸ்டோக்ஸ் (கேப்டன்), ஜாக் கிராலி, பென் டக்கெட், ஆலி போப், ஜோ ரூட், ஹாரி புரூக், ஜேமி ஸ்மித், ஷோயப் பஷீர், பிரைடன் கார்ஸ், கஸ் அட்கின்சன், ஜோஃப்ரா ஆர்ச்சர், மார்க் வுட்.
2 பூர்வக்குடி வீரர்கள்: பெர்த்தில் இன்று தொடங்க உள்ள ஆஷஸ் டெஸ்ட் கிரிக்கெட் தொடரின் முதல் போட்டிக்கான ஆஸ்திரேலிய அணியில் அந்நாட்டின் பூர்வக்குடியை சேர்ந்த ஸ்காட் போலண்ட், பிரெண்டன் டாகெட் ஆகிய 2 வீரர்கள் இடம் பெற்றுள்ளனர். ஆஸ்திரேலிய டெஸ்ட் கிரிக்கெட் வரலாற்றில் ஒரே போட்டியில் பூர்வகுடியை சேர்ந்த இருவர் விளையாடுவது இதுவே முதன்முறை.