மாட்ரிட்: விளையாட்டின் உயர்ந்த விருதான லாரியஸ் விருது வழங்கும் விழா நேற்று ஸ்பெயினின் மாட்ரிட் நகரில் நடைபெற்றது. இதில் சிறந்த வீரர் விருது ஸ்பெயின் டென்னிஸ் வீரர் கார்லோஸ் அல்காரஸுக்கும் சிறந்த வீராங்கனை விருது பெலாரஸின் அரினா சபலெங்காவுக்கும் வழங்கப்பட்டது.
பாரிஸ் செயின்ட் ஜெர்மைன் (பிஎஸ்ஜி) கால்பந்து அணி ஆண்டின் சிறந்த அணியாகத் தேர்ந்தெடுக்கப்பட்டது. அல்காரஸ் கடந்த ஆண்டு பிரெஞ்சு ஓபன், அமெரிக்க ஓபன் பட்டங்களையும், இந்த ஆண்டு ஜனவரியில் ஆஸ்திரேலிய ஓபன் பட்டத்தையும் வென்றிருந்தார். உலகின் முன்னணி வீராங்கனையான சபலெங்கா, கடந்த ஆண்டு அமெரிக்க ஓபன் பட்டத்தை வென்றிருந்தார்.
பிஎஸ்ஜி அணி 2025-ல் முதன்முறையாக சாம்பியன்ஸ் லீக் பட்டத்தை வென்று சாதனை படைத்திருந்தது. இந்த மாதம் மாஸ்டர்ஸ் பட்டத்தைத் தக்கவைத்துக் கொண்ட கோல்ஃப் வீரர் ரோரி மெக்ல்ராய் ‘ஆண்டின் சிறந்த மீண்டெழுந்த வீரர்’ விருதைப் பெற்றார். பார்சிலோனா மற்றும் ஸ்பெயின் அணியின் நட்சத்திரமான 18 வயதான லமைன்யமால், ஆண்டின் சிறந்த இளம் விளையாட்டு வீரருக்கான விருதை வென்றார்.
ஃபார்முலா ஒன் சாம்பியன் லாண்டோ நோரிஸ் ‘ஆண்டின் சிறந்த சாதனையாளர்’ விருதைப் பெற்றார். ஜெர்மன் கால்பந்து ஜாம்பவான் டோனி க்ரூஸ் விளையாட்டு உத்வேக விருதையும் ஓய்வு பெற்ற ஜிம்னாஸ்டிக்ஸ் வீராங்கனை நாடியா கொமானெசி வாழ்நாள் சாதனையாளர் விருதையும் பெற்றனர்.
உலக ஆக் ஷன் விளையாட்டு வீரர் விருது அமெரிக்க ஸ்னோபோர்டு வீராங்கனை குளோயி கிம்முக்கு வழங்கப்பட்டது.
பிரேசிலின் கேப்ரியல் அராயுஜோ மாற்றுத்திறனாளிகளுக்கான ஆண்டின் சிறந்த விளையாட்டு வீரராகத் தேர்ந்தெடுக்கப்பட்டார். இந்த விருது வழங்கும் விழாவை டென்னிஸ் ஜாம்பவான் நோவக் ஜோகோவிச் மற்றும் ஃப்ரீஸ்டைல் ஸ்கீயர் எய்லீன்கு ஆகியோர் தொகுத்து வழங்கினர்.