ஜப்பான் ஓபன்: காலிறுதியில் நுழைந்தார் காஷ்யப், சாய்னா நெவால், ஸ்ரீகாந்த் தோல்வி

ஜப்பான் சூப்பர் சீரிஸ் பாட்மிண் டன் போட்டியில் இந்தியாவின் காஷ்யப் காலிறுதிக்கு முன்னேறி யுள்ளார். அதேநேரத்தில் இந்தியாவின் சாய்னா நெவால், காந்த் ஆகியோர் தோல்வி கண்டு போட்டியிலிருந்து வெளி யேறினர்.

ஜப்பான் தலைநகர் டோக்கியோவில் நடைபெற்று வரும் இந்தப் போட்டியில் நேற்று நடைபெற்ற ஆடவர் ஒற்றையர் 2-வது சுற்றில் காமன்வெல்த் சாம்பியனான காஷ்யப் 21-11, 21-19 என்ற நேர் செட்களில் உலகின் 4-ம் நிலை வீரரும், சகநாட்டவருமான காந்தை தோற்கடித்தார்.

45 நிமிடங்களில் இந்த ஆட்டத்தை முடித்த காஷ்யப், தனது காலிறுதியில் போட்டித் தரவரிசையில் 6-வது இடத்தில் இருக்கும் சீன தைபேவின் சவ் டியென் சென்னை சந்திக்கிறார். சர்வதேச தரவரிசையில் 8-வது இடத்தில் இருக்கும் காஷ்யப், டியெனுடன் 3 முறை மோதி 2 முறை வெற்றி கண்டுள்ளார்.

மகளிர் ஒற்றையர் 2-வது சுற்றில் உலகின் முதல் நிலை வீராங்கனையான இந்தியாவின் சாய்னா நெவால் 13-21, 16-21 என்ற நேர் செட்களில் ஜப்பான் வீராங்கனை மினாட்சு மிடானியிடம் அதிர்ச்சி தோல்வி கண்டார். மிடானி தனது முதல் சுற்றில் மற்றொரு இந்திய வீராங்கனையான பி.வி.சிந்துவை தோற்கடித்தது குறிப்பிடத் தக்கது.

இதேபோல் இந்திய வீரர் எச்.எஸ். பிரணாய் 9-21, 16-21 என்ற நேர் செட்களில் தென் கொரியாவின் லீ டாங் குயெனிடம் தோல்வி கண்டார். தற்போதைய நிலையில் ஜப்பான் ஓபனில் காஷ்யப்பை தவிர எஞ்சிய அனைத்து இந்திய வீரர், வீராங்கனைகளும் தோல்வி கண்டு போட்டியிலிருந்து வெளியேறிவிட்டது குறிப்பிடத் தக்கது.