விசாகப்பட்டினம்
தென் ஆப்பிரிக்க டெஸ்ட் தொடரிலிருந்து ரிஷப் பந்த்துக்குப் பதிலாக விக்கெட் கீப்பிங் பணியை விருதிமான் சாஹா கவனிப்பார். உலகின் சிறந்த விக்கெட் கீப்பர் சாஹா என்று இந்திய அணியின் கேப்டன் விராட் கோலி புகழாரம் சூட்டினார்.
இந்தியா, தென் ஆப்பிரிக்க அணிகளுக்கு இடையிலான 3 போட்டிகள் கொண்ட டெஸ்ட் தொடர் நாளை தொடங்குகிறது. முதல் டெஸ்ட் போட்டி விசாகப்பட்டினத்தில் நாளை நடக்கிறது.
விருதிமான் சாஹாவுக்கு காயம் ஏற்பட்ட பின் அணியில் இளம் வீரர் ரிஷப் பந்த்துக்கு அதிகமான வாய்ப்புகள் வழங்கப்பட்டன. இங்கிலாந்து, ஆஸ்திரேலியாவில் சில போட்டிகளில் சிறப்பாக ஆடிய ரிஷப் பந்த் மற்ற போட்டிகளில் விரைவாக ஆட்டமிழந்தார். மேலும் தவறான ஷாட்களை அடிக்கடி ஆடி ஆட்டமிழந்து விமர்சனங்களைப் பெற்று வந்தார். மேற்கிந்தியத் தீவுகள் தொடரிலும் டெஸ்ட் மற்றும் டி20 தொடரிலும் ரிஷப் பந்த்தின் பேட்டிங் கடுமையான விமர்சனத்துக்குள்ளானது.
இதையடுத்து, விருதிமான் சாஹாவுக்கு வாய்ப்பு வழங்கப்பட்டுள்ளது. 32 போட்டிகளில் விளையாடியுள்ள விருதிமான் சாஹா 1,164 ரன்கள் சேர்த்துள்ளார். கடைசியாக கடந்த 2018-ம் ஆண்டு தென் ஆப்பிரிக்காவுக்கு எதிரான டெஸ்ட் தொடரில் சாஹா விளையாடினார். அதன்பின் விளையாடவில்லை என்பது குறிப்பிடத்தக்கது.
டெஸ்ட் தொடர் தொடங்குவதற்கு முன்பாக கேப்டன் விராட் கோலி இன்று நிருபர்களுக்குப் பேட்டி அளித்தார்.
அப்போது அவர் கூறியதாவது:
தென் ஆப்பிரிக்காவுக்கு எதிரான டெஸ்ட் தொடரில் விக்கெட் கீப்பிங் பணியை ரிஷப் பந்த்துக்குப் பதிலாக விருதிமான் சாஹா கவனிப்பார். சாஹா உடல்நலத்தோடு நலமாக இருக்கிறார். முதல் போட்டியில் அணியில் சாஹா இடம் பெறுவார். சாஹாவின் விக்கெட் கீப்பிங் திறமை அனைவருக்கும் தெரிந்தது. உலகின் சிறந்த விக்கெட் கீப்பர் சாஹா. எப்போதெல்லாம் பேட்டிங் செய்ய வாய்ப்பு கிடைக்கிறதோ அப்போதெல்லாம் சிறப்பாக தனது திறமையை நிரூபித்தும் வருகிறார்.
ஆனால், துரதிர்ஷ்டவசமாக காயம் காரணமாக அவரால் அணியில் இடம் பெற முடியவில்லை. உள்நாட்டு சூழல் சாஹாவுக்கு நன்கு ஒத்துழைக்கும் என நினைக்கிறேன்.
சாஹாவை அணிக்குள் மீண்டும் கொண்டுவர அணி நிர்வாகம் விரும்பியது. மேற்கிந்தியத் தீவுகள் தொடரில் அழைத்துச் சென்றபோதிலும் அவரால் விளையாட முடியவில்லை.
ரிஷப் பந்த்தைப் பொறுத்தவரை வாய்ப்புகள் வழங்கப்பட்டன. சிறப்பாக விளையாடினார். இருந்தாலும், சாஹா சிறப்பான தொடக்கத்தை அளிக்கக் கூடியவர். டெஸ்ட் போட்டிகளைப் பொறுத்தவரை சாஹாவுக்குத்தான் முதல் வாய்ப்பு. நெருக்கடியான நேரங்களில் சிறப்பாக விளையாடக் கூடியவர் சாஹா. அவர் வாய்ப்புக்காகக் காத்திருந்தார். இப்போது அணிக்குள் வந்துள்ளார்.
இந்தப் போட்டியில் இரு சிறப்பு வாய்ந்த சுழற்பந்துவீச்சாளர்களாக ரவிச்சந்திர அஸ்வின், ரவிந்திர ஜடேஜா ஆகிய இருவரும் விளையாடுவார்கள். மூன்றாவது சுழற்பந்துவீச்சாளராக ஹனுமா விஹாரி இருப்பார். மேற்கிந்தியத் தீவுகள் தொடரில் அஸ்வினுக்கு வாய்ப்பு வழங்கப்படவில்லை. ஆனால், ஜடேஜா வழங்கப்பட்ட வாய்ப்பை சிறப்பாகப் பயன்படுத்தினார்.
இந்த டெஸ்ட் தொடரில் அஸ்வின் பிரதானமாக பந்துவீச்சாளராக இருந்து முதலில் பந்து வீசுவார். ஜடேஜாவும் அஸ்வினுக்குத் துணையாக இருப்பார். நமக்கு சூழல் சிறப்பாக இருக்கும்பட்சத்தில் இரு சுழற்பந்துவீச்சாளர்கள் சேர்க்கப்படுவார்கள். உள்நாட்டில் அஸ்வினின் பந்துவீச்சு எதிரணியினருக்கு நிச்சயம் அச்சுறுத்தலாகவே இருக்கும். பேட்டிங்கிலும் குறிப்பிடத்தக்க அளவில் செயல்படுவார்’’.
இவ்வாறு கோலி தெரிவித்தார்.
பிடிஐ