டெஸ்ட் கிரிக்கெட்டிலிருந்து தென் ஆப்பிரிக்கா வேகப்பந்து வீச்சாளர் டேல் ஸ்டெய்ன் ஒய்வு பெறுவதாக அறிவித்தார். தெ. ஆ. அணிக்காக 439 விக்கெட்டுகளைக் கைப்பற்றி அதிக டெஸ்ட் விக்கெட்டுகளைக் கைப்பற்றிய தென் ஆப்பிரிக்க வேகப்பந்து வீச்சாளராக ஓய்வு பெற்றார் ஸ்டெய்ன்.
டெஸ்ட் கிரிக்கெட்டிலிருந்து ஓய்வு பெற்றாலும் டி20 மற்றும் ஒருநாள் போட்டிகளில் டேல் ஸ்டெய்ன் தொடர்ந்து விளையாடுவார்.
“இன்று நான் அதிகம் விரும்பக்கூடிய ஒரு வடிவத்திலிருந்து நிரந்தரமாக விலகும் முடிவை எடுத்துள்ளேன். டெஸ்ட் கிரிக்கெட்தான் சிறந்தது, ஏனெனில் அது உங்கள் மனம், உடல் அளவில் மட்டுமல்லாது உணர்வு ரீதியாகவும் சவாலளிக்கக் கூடியது. இன்னொரு டெஸ்ட் போட்டியில் நான் ஆடப்போவதில்லை என்ற முடிவு பயங்கரமானதுதான். ஆனால் இதை விடவும் அச்சுறுத்துவது ‘இனி விளையாடவே முடியாது’ என்பதுதான். ஆகவே டெஸ்ட்டிலிருந்து ஓய்வு பெறுவது அவசியம் என்ற முடிவுக்கு வந்துள்ளேன். ஆகவே டி20, ஒருநாள் தொடர்களில் ஆடி என் ஆரோக்கியத்தை பராமரித்து இந்த வடிவங்களில் முழு ஆற்றலுடன் ஆட முடிவு செய்துள்ளேன்” என்றார்.
டேல் ஸ்டெய்ன் இங்கிலாந்துக்கு எதிராக 2004-ல் டெஸ்ட்டில் அறிமுகமானார். 93 டெஸ்ட் போட்டிகளில் 439 விக்கெட்டுகளை அவர் 22.95 என்ற சராசரியில் கைப்பற்றியுள்ளார். 26 முறை ஒரு இன்னிங்சில் 5 விக்கெட்டுகளையும் ஒரு டெஸ்ட் போட்டியில் 10 விக்கெட்டுகள் சாதனையை 5 முறையும் நிகழ்த்தியுள்ளார் ஸ்டெய்ன்.