நேற்றைய போட்டியில் 137 ரன்கள் விளாசியதன் மூலம் இந்தியாவுக்கு எதிராக 4-வது ஒருநாள் போட்டி சதத்தை டேரில் மிட்செல் எடுத்து சாதனை படைத்துள்ளார். மேலும் கடந்த 4 போட்டிகளில் அவர் விளாசும் 3-வது சதமாகும் இது. ஒட்டுமொத்தமாக ஒருநாள் போட்டிகளில் அவர் எடுக்கும் 9-வது சதமாகும் இது.
இந்திய மைதானங்களில் இந்தியாவுக்கு எதிராக 7 போட்டிகளில் விளையாடியுள்ள டேரில் மிட்செல் 4 சதங்களை எடுத்துள்ளார். இந்த வரிசையில் தென் ஆப்பிரிக்க வீரர் ஏ.பி.டிவில்லியர்ஸ் இந்தியாவில் 11 போட்டிகளில் இந்தியாவுக்கு எதிராக விளையாடி 5 சதங்களை விளாசி முதலிடத்தில் இருக்கிறார். அதுமட்டுமல்லாமல், இந்திய மைதானங்களில் அதிக சதம் (4சதங்கள்) விளாசிய நியூஸிலாந்து வீரர்கள் வரிசையில் டேரில் மிட்செல் 2-வது இடத்தில் உள்ளார்.
இந்த வரிசையில் நியூஸிலாந்து வீரர் நாதன் ஆஸ்லே 5 சதங்களுடன் முதலிடத்திலும், 3 சதங்களுடன் கிறிஸ் கெயின்ஸ் 3-வது இடத்திலும், 3 சதங்களுடன் ராஸ் டெய்லர் 4-வது இடத்திலும் உள்ளனர். பிலிப்ஸ் 2-வது சதம்: நேற்றைய போட்டியில் சதம் விளாசியதன் மூலம் சர்வதேச ஒரு நாள் போட்டிகளில் தனது 2-வது சதத்தை நியூஸிலாந்து வீரர் கிளென் பிலிப்ஸ் எடுத்துள்ளார்.
கான்வேயை 3 முறை வீழ்த்திய ராணா
நடப்பு ஒருநாள் கிரிக்கெட் தொடரில் நியூஸிலாந்து வீரர் டேவன் கான்வேயை, இந்திய வீரர் ஹர்ஷித் ராணா 3-வது முறையாக ஆட்டமிழக்கச் செய்துள்ளார்.
இந்தத் தொடரில் இதுவரை 3 போட்டிகளில் 23 பந்துகளை டேவன் கான்வேவுக்கு வீசியுள்ள ராணா, 3 முறை அவரது விக்கெட்டை எடுத்துள்ளார். அவரது ஓவரில் 18 ரன்களை மட்டுமே எடுத்துள்ள கான்வே 3 முறை ஆட்டமிழந்துள்ளார்.
அதிக முறை 50 பிளஸ் ஸ்கோர்
ஒருநாள் கிரிக்கெட் போட்டிகளில் இந்திய அணிக்கு எதிராக தொடர்ச்சியாக அதிகம் முறை 50 அல்லது அதற்கு அதிகமான ஸ்கோரைக் குவித்தவர்கள் வரிசையில் டேரில் மிட்செல் 2-வது இடத்தில் உள்ளார்.
நேற்றைய போட்டியுடன் அவர் 4 முறை தொடர்ச்சியாக 50 அல்லது அதற்கு அதிகமான ஸ்கோரை இந்திய அணிக்கு எதிராக எடுத்துள்ளார். இந்த வரிசையில் நியூஸிலாந்து வீரர்கள் கேன் வில்லியம்ஸன் 5 முறையுடன் (2014-ம் ஆண்டு) முதலிடத்திலும், கிளென் டர்னர் 3 முறையுடன் 3-வது இடத்திலும்(1975-76), ஸ்டீபன் பிளெமிங் 3 முறையுடன் 4-வது இடத்திலும்(1994-95), ரோஜர் டுவோஸ் 3 முறையுடன் 5-வது இடத்திலும்(1999), ராஸ் டெய்லர் 3 முறையுடன் 6-வது இடத்திலும்(2019-20) உள்ளனர்.
14 போட்டிகளில் 26 விக்கெட்கள்
இந்திய அணிக்காக முதல் 14 போட்டிகளில் விளையாடி 26 விக்கெட்களை ஹர்ஷித் ராணா வேட்டையாடியுள்ளார். இதன்மூலம் முதல் 14 போட்டிகளில் அதிக விக்கெட்களை வேட்டையாடிய இந்திய வீரர்கள் வரிசையில் அவர் 3-ம் இடத்தில் உள்ளார்.
இந்த வரிசையில் முதல் இடத்தில் அஜித் அகர்கரும் (32 விக்கெட்கள்), 2-வது இடத்தில் இர்பான் பதானும் (27 விக்கெட்கள்), 4-ம் இடத்தில் பிரசித் கிருஷ்ணாவும் (25 விக்கெட்கள்), 5-ம் இடத்தில் ரவிச்சந்திரன் அஸ்வினும் (24 விக்கெட்கள்), 6-ம் இடத்தில் ஜஸ்பிரீத் பும்ராவும் (24 விக்கெட்கள்) உள்ளனர்.